Дзюдочиларимиз янги замонавий спорт залига эга бўлишди ФОТОГАЛЕРЕЯ

Уч кун давомида пойтахтимиз мезбонлигида муваффақиятли тарзда ўтган Тошкент Гран-приси якунланган куннинг эртасигаёқ ушбу объектнинг топширилишида ҳам ўзига хос рамзийлик бордек. 

Ёдингизда бўлса, 4 сентябрь куни Ўзбекистон Республикаси Президенти Шавкат Мирзиёев раислигида ўтган жисмоний тарбия ва спортни ривожлантириш бўйича видеоселектор йиғилишида Давлатимиз раҳбари жойларда енгил конструкцияли, яъни сэндвич-панелли спорт иншоотларини қуриш бўйича кўрсатма берган эди. 

Ўзбекистон дзюдо федерацияси биринчилардан бўлиб ана шу ишга қўл урди. Қисқа фурсат ичида ана шундай енгил конструкцияли машғулот зали бунёд этилди.

Ушбу залнинг тантанали очилиш маросимида Ўзбекистон Жисмоний тарбия ва спорт вазири Дилмурод Набиев, вазирнинг биринчи ўринбосари Ойбек Касимов, Ўзбекистон Миллий олимпия қўмитаси президенти Рустам Шоабдураҳмонов, МОҚ вице-президенти, Ўзбекистон дзюдо федерацияси раиси Азизжон Камилов, дзюдочилар ҳамда оммавий ахборот воситалари ходимлари ҳозир бўлишди.

Тадбирда сўзга чиққан Рустам Шоабдураҳмонов муваффақиятли ўтган Тошкент Гран-присига алоҳида тўхталиб, терма жамоамиз дзюдочиларининг якунда умумжамоа ҳисобида биринчи ўринни эгаллаганини алоҳида таъкидлади. Дилмурод Набиев эса ўз сўзида янги бунёд этилган спорт залидан янги чемпионлар етишиб чиқишига тилак билдирди. 

Шундан сўнг дзюдочиларимиз янги спорт залида терма жамоа бош мураббий Фарҳод Тўраев бошчилигида илк машғулотни ўтказишди.  

Маросим сўнггида Ўзбекистон дзюдо федерацияси раиси Азизжон Камилов Ўзбекистон Миллий олимпия қўмитаси президенти Рустам Шоабдураҳмонов ва Ўзбекистон Жисмоний тарбия ва спорт вазири Дилмурод Набиевга зарбоп чопон ҳамда эсдалик нишони топширди.

Суратлар муаллифи - Алимурод Мамадаминов