Эгизак Каримов ва яна уч курашчимиз Польша турнирида шоҳсупага кўтарилишди

Республика олимпия захиралари коллежининг спорт курашлари бўлимида таҳсил олаётган ёш эркин курашчиларимиз - Амирхон ва Ҳожихон Каримов, Абдуллоҳ Машрабов, Яккакураш спорт турларига ихтисослаштирилган болалар-ўсмирлар спорт мактаби тарбияланувчилари Шоҳруҳ Раимов ва Озодбек Озодбеков Польшада ўтказилган халқаро турнирда муваффақиятли иштирок этишди. 

Эътиборлиси, Санжар Машрабов шогирдларининг бари Польша, Германия, Словакия, Россия, Молдова, Украина ва Болгариядан ёш курашчилар иштирок этган мусобақада шоҳсупага кўтарилган. Эгизак Каримовлар битта вазнда қатнашиб, финалга етиб келишди. Одатга кўра финалда бир-бирларига қарши гиламга чиқишмади ва олтин, кумуш медалларни бўлишиб олишди. 

Шоҳруҳ Раимов ва Озодбек Озодбеков кумуш медални қўлга киритди, Абдуллоҳ Машрабов халқаро турнирнинг бронза медалига сазовор бўлди. 

Энди ёш курашчиларимиз Грецияга йўл олишади. Олимпиаданинг тарихий ватанида, аниқроғи Крит оролида ўсмирлар ўртасида халқаро турнир ўтказилади.