“Eindhoven Cup”. Асадхўжа Мўйдинхўжаев ва Тўрабек Ҳабибуллаев 1/2 финалда қандай натижа қайд этди?

Мусобақада иштирок этаётган чарм қўлқоп усталаримиз 1/2 финал жангларини ўтказишди. Париж-2024 Олимпиадаси чемпиони Абдумалик Ҳалоков боксчиларимизнинг бу босқичдаги иштирокини бошлаб берганди. -60 кг вазндаги бухоролик боксчимиз мезбонлар вакили Маҳмуд Ал Чабтунгни ҳакамларнинг якдил қарори билан 5:0 ҳисобида мағлубиятга учратиб, финалга йўл олди. 

-70 кг вазнда рингга чиқаётган яна бир Олимпиада чемпионимиз Асадхўжа Мўйдинхўжаев озарбайжонлик Наби Исгандаровдан 5:0 ҳисобида устун келди. Париж-2024 Олимпиадаси иштирокчиси Тўрабек Ҳабибуллаев (-90 кг) эса қозоғистонлик Тоғамбай Сағиндикка қарши кечган муросасиз жангда 4:1 ҳисобида зафар қучиб, у ҳам финал иштирокчисига айланди.