Элнур Абдураимов: Лицензиям бўлсада Олимпиадада иштирок эта олмагандим, бу сафар имкониятни бой бермоқчи эмасман

Ушбу мусобақада иштирок этувчи боксчилар номи ҳозирча маълум қилинмаган. Лекин мухлислар -63 кг вазн тоифасида икки боксчи номзодини кўришмоқда. Улар - ЖЧ совриндорлари Элнур Абдураимов ва Иқболжон Холдоровлардир. Айни пайтда йигитларимиз Тошкент вилоятидаги ўқув-машғулот йиғинларида иштирок этишмоқда. Биз лицензион турнир олдидан терма жамоамиз аъзоси Элнур Абдураимовнинг фикрлари билан қизиқдик. 

"Ҳаваскор боксга қайтишим қийин бўлди, чунки профессионал боксда ҳам бунгача 5 та жанг ўтказиб, 5 та ғалабага эришгандим. Проф рингдаги охирги жангимни ўтказганимга анча бўлди. Август ойида яна ҳаваскор боксга қайтдим. Шундан сўнг Россияда 1-2 та жанг ўтказдим ва маҳорат оширдим, Жаҳон чемпионатида эса ҳаваскор бокс формасига киришга бироз вақт етмади, у ерда америкалик рақибга техника томонлама имкониятни бой бердим. Чунки, ҳаваскор ва профессионал бокс орасида фарқ бор. Профессионал боксда кучни раундларга тўғри тақсимлай олиш лозим. Ҳаваскор боксда эса барчаси тезда ҳал бўлади. Жаҳон чемпионати мен учун сабоқ бўлди. Ушбу чемпионатдан сўнг мен Ўзбекистон биринчилигида иштирок этдим ва ғалаба қозондим. Ўз навбатида ушу муваффақият менга катта куч берди. Ҳозирда ўқув-машғулот йиғинларида иштирок этмоқдамиз. Насиб қилса, спарринг жанг ўтказаман ва ғалаба қозонаман. Чунки, 2016 йилда лицензиям борлигига қарамай Рио Олимпиадасида иштирок этиш насиб қилмаган эди. Ушбу имкониятни қўлдан бой бермоқчи эмасман. Худо хоҳласа ғалаба қозониб, лицензион турнирда Олимпиада йўлланмасини қўлга киритиб, яхши натижа билан халқимизни, юртбошимизни хурсанд қилмоқчиман. 

Кимлардир "Элнур профессионал боксда фаолиятини давом эттириши керак" ёки шу каби бошқа фикрларни билдиради. Худо хоҳласа, бу мусобақада мен сенсация кўрсатаман. Барчани ишончини оқлайман. Худо хоҳласа, бу сафар Олимпиадага бориш насиб қилади. 

Авваламбор барчаси Оллоҳдан. Мусобақада иштирок этиш кимга насиб қилган бўлса ўша боради. Умид қиламанки, у ерга яхши кайфиятда бориб, яхши натижалар билан юртимизга қайтамиз", - деди Элнур Абдураимов.