European Chess Club Cup. Абдусатторовда кетма-кет тўртинчи ғалаба!

Эркаклар ўртасидаги European Chess Club Cup мусобақаси ўз тарихида 39, аёллар иштирокидагиси эса 28-маротаба ташкил этиляпти. Бу йилги қитъа кубогида уч нафар гроссмейстеримиз Европа клублари таркибида муваффақиятли тарзда қатнашаётгани ҳақида хабар берган эдик.

Нодирбек Абдусатторов ва Жавоҳир Синдаров Руминиянинг "SuperChess", Нодирбек Якуббоев эса Словениянинг "TAJFUN-ŠK Ljubljana" жамоалари шарафини ҳимоя қиляпти. Кеча 5-турда "SuperChess" клуби Сербиянинг "SK JAVES Modra" жамоасини 5:1 ҳисобида доғда қолдирди. Абдусатторов Томас Лаурусасни, Синдаров эса Федерик Йозефни мағлубиятга учратиб, жамоасининг умумий муваффақиятига ҳисса қўшди. 

Нодирбек Якуббоевнинг "TAJFUN-ŠK Ljubljana" жамоаси эса 5-турда Черногориянинг "Elektroprivreda" клубидан 4:2 ҳисобида устун келди. Якуббоев Никита Петров билан дуранг ўйнади. Турнинг марказий учрашуви икки пешқадам "Alkaloid" (Македония) ва "Turkish Airlines" (Туркия) жамоалари ўртасида ўтказилиб, 3:3 ҳисобидаги жанговар дуранг натижа билан якунланди. 

Бешинчи турдан сўнг карвонбоши ўзгарди. Бешта учрашувнинг барчасида ғалаба қозонган Чехиянинг "Novy Bor Chess Club" клуби 10 очко билан якка пешқадамга айланиб олди. "Turkish Airlines", "Alkaloid" ва "C'Chartres Echecs" клублари ҳисобида 9 тадан очко бор. "SuperChess" ва "TAJFUN-ŠK Ljubljana" клублари 8 очко билан қўшимча кўрсаткичларга кўра мос равишда 5 ҳамда 7-ўринларни банд этишган. 

Бугун 6-турда "SuperChess" "Tuxera Aquaprofit Nagykanizsai Sakk Klub" билан, "TAJFUN-ŠK Ljubljana" клуби эса "Beer Sheva Chess Club" жамоаси билан ҳисоб-китоб қилади.