Фабио Каннаваро: "Футболчи 17–19 ёшда тайёр бўлса, МТЖга чақирилиши лозим. Нега уларни U-21, U-23 жамоаларида қолдиришимиз керак?"

"Оқ бўрилар" устози бу йиғинда бир қатор янги номларни синовдан ўтказди. Улар орасида Самандар Муратбаев ва Беҳруз Каримов каби ёшлар ҳам бор эди. Фабио Каннаваро бу ҳақда ЎФА матбуот хизматига берган интервьюсида гапирди. 

"Гап ёшда эмас, сифатда. Футболчининг неча ёшга кирганини эмас, истеъдоди ва жангчи сифатидаги характери муҳим. Футболчи 17-19 ёшда тайёр бўлса, миллий жамоага жалб қилиниши керак. Нега уларни ёши кичик деб, U-21, U-23 жамоаларида қолдиришимиз керак? 

Агар қайсидир ўйинни кўргани борсам, бу шунчаки ташриф эмас. Мен футболчини ўз кўзим билан реал вазиятдаги ҳаракатларини кўришни истайман. Сафарда бўлсам ҳам стадионларга боришни яхши кўраман. Ўйинни жонли кўришга ҳеч нарса етмайди. Уйда ўтириб, кетма-кет бир нечта видеони кўриш мен учун зерикарли. Мен стадионга бориб футболчини бевосита кузатгим келади, чунки кичик деталларни видео орқали кўра олмайсиз. Айнан ўша майда жиҳатлар кейинчалик муҳим бўлиб чиқади", – дейди Каннаваро.