Фабио Каннаваро журналистларга: "Эртага ҳатто сизни ҳам терма жамоага чақиришим мумкин. Футбол ўйнашни биласизми?"

Мураббий: Хайрли тонг. Осиё Кубогидан кейин сиз жуда кучли жамоага қарши ўйнаяпсиз. Мен бу саволни Федерацияга беряпман, чунки биз ҳар доим кучли жамоаларга қарши ўйнашга ҳаракат қилишимиз керак, футболчиларимиз шундай қийинчиликларга дуч келиши зарур. Эрон терма жамоасини таништириб ўтишнинг ҳожати йўқ, ҳамма биладики, бу топ даражадаги футболчилари ва катта тажрибага эга бўлган Осиёнинг энг кучли терма жамоаларидан бири. Ўйлайманки, уларга қарши ўйнаш биз учун жуда фойдали бўлади.

Элдор Шомуродов: Ҳамма нарса гапириб ўтилди, миллий терма жамоадаги узоқ танаффус ва катта ўзгаришлардан кейин бу жуда яхши имконият бўлади. Эртанги ўйин кучли жамоага, Осиёнинг энг кучлиларидан бирига қарши кечади ва бу бизга ўзимизнинг заиф томонларимизни кўрсатиб беради. Бундай ўртоқлик учрашувлари жуда фойдали. Яхши ўйин кўрсатиб, ижобий натижага эришишга ҳаракат қиламиз.

Журналист: Ассалому алайкум, Самандар Шокиров, Championat.Asia сайти. Жамоадаги ўзгаришларни кўряпмиз, бу яхши. Лекин Жаҳон чемпионати ортда қолди, кейинги расмий ўйинларгача сиздан ўртоқлик учрашувларида натижа талаб қилинмайди. Бироқ Осиё Кубогида миллий терма жамоадан чемпионликни кутяпмиз. Раҳбарият ҳам сизга шундай вазифа қўйган. Менинг саволим шундай: агар Фабио Каннаваро Осиё Кубогида қониқарли натижага эришмаса, миллий терма жамоадан истеъфога чиқадими?


Мураббий: Биз бу ерда эртанги ўйин ҳақида гаплашяпмиз!

Журналист: Иккалангизга ҳам саволим бор. Йил бошида Аргентина терма жамоаси Тошкентда ўйнаши ҳақида кўп гап-сўзлар бўлди. Бу қанчалик ҳақиқат эди? Ва шу кунларда иккинчи рақиб сифатида Сурия танланди. Сурия Ўзбекистон учун қанчалик жиддий рақиб ҳисобланади?


Мураббий: Ҳа, Аргентинага қарши ўйнашга ҳаракат қилганимиз ҳақиқат. Афсуски, Аргентина Федерацияси сўнгги 3 ҳафта ичида Мессининг хайрлашув учрашувини ўтказишга қарор қилди, шунинг учун биз Сурияни топдик. Албатта, Сурияга қарши ўйнаш ҳар доим қийин, чунки биз уларни биламиз. Бу яхши жамоа. Албатта, барча ҳурматни сақлаган ҳолда, бу Аргентина эмаслигини биламиз, лекин биз бошқа кучли терма жамоа билан ҳам яхши ўйин кўрсатиш учун бор кучимизни ишга соламиз. Афсуски, биз Сурия билан ўйнаймиз.

Элдор Шомуродов: Мураббий ҳамма нарсани айтиб ўтди.

Журналист: Жаҳон чемпионатига чиқа олмаганимиз муносабати билан, иштирок этган баъзи футболчилар учун миллий терма жамоа эшиклари ёпилдими? Ёки Осиё Кубогигача уларни яна кўрамизми?


Мураббий: Эшиклар ҳамма учун очиқ! Жаҳон чемпионатидан кейин кўплаб ўйинчилар — кимдир клубсиз, кимдир ўйин амалиётисиз қолди, кимдир жароҳат олган. Шунинг учун миллий терма жамоага келиш учун бошқа бировга имконият бериш оддий ҳолат деб ўйлайман. Ишонаманки, миллий терма жамоа ҳар бир ўйинчи учун очиқ. Биз ҳаммани кузатяпмиз, кўплаб ўйинларни кўриб борамиз, иложи бўлганда машғулотларни ҳам томоша қиламиз. Ва ҳозир барча футболчиларни биламиз. Албатта, биз ҳаммага имконият беряпмиз.

Журналист: Хайрли кун. Муҳаммад Ҳакимов ҳақида. Сиз ёш футболчини биринчи марта чақирдингиз. Бу ёш йигитни ва унинг миллий терма жамоадаги тўғри ривожланишини қандай кўряпсиз?


Мураббий: Мен бу ёш футболчини чақирдим, у Жаҳон чемпионатидан олдин ҳам... Ўйлайманки, у майдонда қўрқмайдиган, яхши характерга ва шахсиятга эга ёш йигит. У биз узоқ вақтдан бери кузатиб келаётган футболчилардан бири. Ғоя шундан иборатки, уларни ўйнатиш, уларга майдонга тушиш учун имконият бериш керак. Мен учун бу ерда ёш ёки қари футболчи йўқ, миллий терма жамоа ўйинчилари бор. Шунинг учун, агар йигитда етарли сифат ва истиқбол бўлса, агар фахрий футболчи яхши ўйнаётган бўлса — у ўйнайди!

Журналист: Терма жамоага чақирган футболчиларингизни айнан қандайдир критерия туфайли танлайсизми? Мундиалдан олдин жароҳатланган футболчилар чақирилди. Энди эса жуда кўп ёшлар, бунинг сабаби нимада? Сиз рўйхатни қайси критериялар туфайли тузасиз? Масалан сўнгги хорижлик мураббий критерияларини очиқчасига айтганди. Жамшид Искандеровни нега чақирмадингиз деган саволга, менга гавдаси йирик футболчилар керак, деб очиқчасига айтганди.


Мураббий: Футболчилар танловига келсак, мен эрталаб туриб қандайдир футболчиларни танлаб кетмайман. Ҳар доим иқтидорли, терма жамоага ёрдам бера оладиган футболчиларни чақирамиз. Чемпионатда яхши ўйин ўтказаётган футболчиларни жалб қиламиз. Жамоага ёрдам берадиган йигитлар шу ерда. Биз барчани кузатиб борамиз. Қайсидир футболчи чақирилмаса демак сабаби бор.

Журналист: Жаноб, сиз Суперлигада яхши ўйнаётган йигитларни терма жамоага чақирамиз ва лигани кузатиб борамиз дедингиз. Владимир Назаров ажойиб дарвозабон, аммо у сўнгги вақтларда "Пахтакор" U21 жамоасида ўйнади. Сиз "Пахтакор"нинг ўринбосарлар жамоасининг ўйинини кузатганингизга ишонмайман. У фақатгина "Ал Аҳли"га қарши ўйнади. Назаровни нима сабаб учун чақирдингиз? Масалан, Ризақулов ҳам нега чақирилди деган савол бор?


Мураббий: Чунки у яхши пас бера олади. У бизга яхши пас бера олиш қобилияти орқали фойда келтиради. Сабаби жуда оддий (кулади). Биз нима қилсак ҳам доим қандайдир муаммо бўлади... Футбол шуниси билан ҳам қизиқ. Ҳамма ҳар хил фикрлайди ва турли хил назарга эга. Агар сизда ҳам яхши жиҳатларни кўрсам, мен эртага сизни терма жамоага чақираман. Сиз футбол ўйнашни биласизми? Агар, бизга фойда келтирсангиз сизни ҳам чақираман.

Мураббий (давом этади): Агар терма жамоага чақирилмаган футболчилар рўйхатига қарасангиз, бор-йўғи 1 ёки 2та футболчи ЖЧдан бери стабил яхши ўйнаб келмоқда. Тўғрими?

Журналист: Ҳа.


Мураббий: Сиз Суперлигани кузатасиз. Мен ҳам Лигани кузатаман. Фикримиз бир жойдан чиқди. Стабил ўйнай олмаганлар бор. Жароҳат олганлар бор. Мен терма жамоага келажакда ёрдам бериши мумкин бўлганларни чақирдим. Хўш, муаммо нимада? Нимадан норозисиз? Олдинги мураббий фақат 22-23 та ўйинчига эътибор қаратган эди ва сизлар у фақат шунча футболчига таянаётганидан шикоят қилар эдингиз. Энди биз барчага эшикларни очганимизда яна муаммо пайдо бўлди... Балансни ушланглар, илтимос!

Журналист: Тўғри жаноб, аммо бундай ҳолатда ҳозирги кунда яхши ўйнаб турган ўйинчиларга нисбатан бироз адолатсизлик бўлгандек...


Мураббий: Кимга нисбатан? Ким сизнинг назарингизда ҳозир яхши ўйнаяпти?

Журналист: Муҳиддинов, Алибоев ва....


Мураббий: Сиз битта ўйинни кўриб гапиряпсиз....

Журналист: Жаноб, сизнинг футболдаги тажрибангиз ва менинг футболда кўрганларим билан фарқ жуда катта.


Мураббий: Йўқ, ҳаммамиз хато қиламиз тўғри. Кеча сиз менга "революция" бўляпти дедингиз. Бунинг нимаси "революция"? Сиз учун бу "революция"дир, мен учун эса ёшларга имконият бериш. Мен яхши ўйнаган йигитларга ўз кучини терма жамоада кўрсатишга имконият беришга қарор қилдим. Иккимизнинг фикрлашимиз ҳар хил, сиз мени ҳурмат қилинг. Мен сизни ҳурмат қиламан.