22 июн 11:55
Янгиликлар

Теннис

Фарғона “Фьючерс”. Юсуповадан яна сенсация, у ярим финалда!

Хабар берганимиздек, шу кунларда Фарғона шаҳридаги “Истиқлол” теннис кортларида “Фьючерс” туркумига кирувчи турнир давом этмоқда.

Мусобақанинг мукофот жамғармаси 25 000 АҚШ долларини ташкил қилади. Асосий тўрга саралаш баҳслари орқали етиб келган истеъдодли теннисчимиз Гўзал Юсупова кетма-кет учта учрашувда кучли рақибиларини енгиб, мусобақанинг ярим финалига йўл олди.

Юсупова ҳозиргина якунига етган чорак финал баҳсида дунёнинг 525-ракеткаси россиялик София Лансерени 7:6(3), 6:0 ҳисобида мағлуб этди. Энди у финал чиптаси учун яна бир россиялик теннисчи Анастасия Фроловага қарши кортга чиқади.

Маълумот учун, WTA рейтингида ўз ўрнига эга бўлмаган ҳамюртимиз аввалига рейтингда 640-поғонадан жой олган ҳиндистонлик Рия Бхатияни 7:6(1), 6:4, иккинчи босқичда турнирнинг тўртинчи, дунёнинг 335-ракеткаси украиналик Валерия Страховани 0:6, 7:6(10), 7:6(6) ҳисобида таслим этган эди.