FIDE президентининг Ўзбекистонга ташрифи давом этмоқда

Дворкович бошчилигидаги делегация юртимизга ташрифи давомида яна икки йилдан кейин мамлакатимизда ўтадиган 46-Бутунжаҳон шахмат олимпиадасига тайёргарлик ҳамда пойтахтимизда ёшлар ўртасида ўтадиган “Тошкент-2025” ўйинларига ҳозирлик жараёнлари билан танишди.

Делегация аъзолари 46-Бутунжаҳон шахмат олимпиадасини ўтказиш бўйича мамлакатимизда олиб борилаётган ишлар, тайёргарлик жараёнлари ҳамда шахматни ривожлантиришга қаратилган ислоҳотлар билан яқиндан танишди.  

Танишув давомида FIDE президенти Ўзбекистонда шахматнинг оммавийлигини таъминлаш борасида шахсан Президент Шавкат Мирзиёевнинг кўрсатаётган алоҳида эътибори қисқа фурсатда ўз самарасини берганини таъкидлаб, кейинги 6-7 йилликда Ўзбекистон нафақат спорт, балки барча соҳаларда катта юксалиш сари юзланганини эътироф этди.