Фомин камбэк эвазига Тбилиси "Челленжер" асосий тўрига чиқди

Мусобақанинг саралаш баҳсларида ҳамюртимиз Сергей Фоминнинг ҳам иштирок этаётгани ҳақида хабар берган эдик. Мамлакатимизнинг иккинчи ракеткаси саралашнинг 1/2 финалида грециялик машҳур теннисчи Стефанос Циципаснинг укаси Павлос Циципасни 6/3, 7/5 ҳисобида мағлубиятга учратганди. 

Фомин бироз аввал якунига етган саралашнинг финал баҳсида россиялик Семен Панкинни камбэк эвазига таслим этди. Биринчи сетни 2/6 ҳисобида бой берган ҳамюртимиз иккинчи сетни тай-брекда ўз фойдасига ҳал қилди - 7/6(3). Учинчи ҳал қилувчи сетда тажриба ўз сўзини айтди - 6/2. Иккинчи сет ўрталарида ёмғир сабаб учрашув бир неча дақиқага тўхтаб қолганди.   

Таққослаш учун, Фомин ATP рейтингида 462, Циципас 1127, Панкин эса роппа-роса 900-поғонадан жой олган. Бугунги учрашув давомида Фомин 12 та, рақиби эса 5 та  эйс зарбасини амалга оширган. Иккала теннисчи ҳам 4 тадан қўшхатога йўл қўйди.