Фомин Тбилиси "Челленжер" турнирининг асосий тўрида ҳам зафар қучди

Мукофот жамғармаси 60 000 долларни ташкил қилувчи мусобақанинг саралаш баҳсларидан иштирокини бошлаган Сергей Фомин икки ғалаба эвазига асосий тўрга йўлланмани қўлга киритганди. Ҳамюртимиз бироз аввал якунига етган асосий тўрнинг илк давра учрашувида ҳам ғалабага эришди. 

Мамлакатимизнинг иккинчи ракеткаси рейтингда ўзидан юқорида бораётган грузиялик Александр Бакшини 6/3, 6/7(5), 6/1 ҳисобида мағлубиятга учратди. Роппа-роса икки соат давом этган учрашувида Фомин 13, Бакши эса 5 та эйс зарбасини амалга оширди. Сергей қўшхатога йўл қўймади. Рақибининг бу борадаги статистикаси 6 тани ташкил этди. 

Таққослаш учун, Сергей Фомин ATP рейтингида 462, Александр Бакши эса 448-поғонадан жой олган. Бу теннисчиларнинг ўзаро ўтказган учинчи учрашуви бўлди. Ҳамюртимиз илк бор ноқулай рақибини мағлуб этишни уддалади. Теннисчимизнинг 1/8 финалдаги рақиби бироздан кейин аниқланади.