Freestyle Chess Grand Slam. 1/4 финалда Абдусатторов - Карлсен баҳси. Синдаров кимни танлади?

Дунёнинг кўзга кўринган гроссмейстерлари қатнашаётган мусобақада икки шахматчимиз - Нодирбек Абдусатторов ва Жавоҳир Синдаров ҳам ўз маҳоратини намойиш қиляпти. 17 февралга қадар давом этадиган турнир айлана тизимда ўтказилиб, унда бир шахматчи қолган ҳамма иштирокчилар билан рапид форматида ўзаро баҳс олиб боради. 

Иккинчи кунги баҳслардан сўнг 1/4 финалга йўл олган шахматчилар маълум бўлди. Саралаш баҳсларини кўтаринки руҳда ўтказган Жавоҳир Синдаров иккинчи, бироз омади юришмаётган Нодирбек Абдусатторов эса 7-ўринни эгаллаган ҳоолда плей-оффга чиқди. 

Регламентга кўра, пешқадамлар 1/4 финалдаги рақибни ўзлари танлаш имкониятига эга эдилар. Қўшимча кўрсаткичларга кўра 1-ўринни эгаллаган Алиреза Фирузджа нисбатан осонроқ рақиб - германиялик Винсент Кеймерни танлади. Иккинчи ўрин билан плей-оффга чиққан Жавоҳир Синдаровнинг танлови Магнус Карлсен ва бошқа иштирокчиларни ҳайрон қолдирди. У америкалик Ҳикару Накамурани танлади.  

Нодирбек Абдусатторов 1/4 финалда норвегиялик афсона Магнус Карлсенга қарши баҳс олиб борадиган бўлди. Кеча бу икки гроссмейстернинг саралаш босқичидаги учрашувида Карлсен ғалаба қозонганди. Чорак финалнинг сўнгги жуфтлигида амалдаги жаҳон чемпиони Гукеш Доммараджу Фабиано Каруанага қарши дона суради.