Freestyle Chess Grand Slam. Абдусатторов - Карлсен баҳси кутилганидан эртароқ якунланди

Дунёнинг кўзга кўринган гроссмейстерлари қатнашаётган мусобақада икки шахматчимиз - Нодирбек Абдусатторов ва Жавоҳир Синдаров ҳам ўз маҳоратини намойиш қиляпти. Улар кечаги саралаш баҳслари якунларига кўра чорак финал йўлланмасини қўлга киритишганди. 

Афсуски, ҳозиргина якунига етган 1/4 финалнинг илк учрашувида Нодирбек Абдусатторов қора доналарда норвегиялик шахмат афсонаси Магнус Карлсенга имкониятни бой бериб қўйди. Эртага шахматчилар ўртасидаги иккинчи партия ўйналади. Унда Нодирбек оқ доналарда ҳаракат қилади. Дуранг натижа ҳам Магнусни 1/2 финалга олиб чиқади. Абдусатторов фақат ғалаба эвазигагина учрашувни тай-брекка ўтказиши мумкин бўлади. 

Айни дақиқаларда саралаш баҳсларини кўтаринки руҳда ўтказган Жавоҳир Синдаров америкалик Ҳикару Накамурага қарши ўйнаяпти. Ҳамюртимиз оқ доналарда ҳаракат қилпяпти ва бироз устунлик АҚШ шахматчиси томонида бўлиб турибди.