Фрэнсис Нганну Жейк Полнинг эҳтимолий рақиблари қаторида

Аввалроқ, америкалик Райан Гарсия ушбу жанг учун захира варианти сифатида илгари сурилганди. Энди эса ММА юлдузи, собиқ UFC чемпиони Фрэнсис Нганну ҳам Жейк Полнинг рақиби сифатида эътироф этилмоқда.   

Таниқли шарҳловчи Майк Коппингернинг маълум қилишича, Гарсиядан ташқари бокс бўйича иккинчи ўрта вазн тоифасида мутлақ жаҳон чемпиони Теренс Кроуфорд, шунингдек, MMA юлдузлари Фрэнсис Нганну ва Нейт Диас номзодлари кўриб чиқилмоқда.

"Жейк Полнинг қайтиши декабрга кўчирилиши мумкин, чунки Netflix’да 14 ноябрга режалаштирилган кўргазма жанги Жервонта Дэвисга қарши сўнгги айбловлар туфайли хавф остида қолди. Манбаларнинг маълум қилишича, эҳтимолий саналар 12 ва 19 декабрь. Гарсия ва Теренс Кроуфорд аллақачон музокараларга таклиф қилинган. Яна икки номзод кўриб чиқилмоқда: Фрэнсис Нганну ва Нейт Диас", - деб ёзди мухбир ижтимоий тармоқдаги саҳифасида.

Маълум бўлишича, Жервонта "Танк" Дэвис стрип-клублардан бирида бар официанткасини ўғирлаб кетиб, калтаклаганликда айбланмоқда. Айнан шу айблов ортидан у Майамида бўлиб ўтиши керак бўлган бокс оқшомида иштирок эта олмайди.