Гандбол: ўсмирлар ва қизлар терма жамоалари ўқув-машғулот йиғинларида қатнашмоқда

20 майга қадар давом этадиган мазкур йиғин ёш гандболчиларимиз учун жорий йил ноябрь ойида Хитойнинг Шантау шаҳрида бўладиган ўсмирлар ўртасидаги III ёшлар Осиё ўйинларига тайёргарлик босқичи вазифасини ўтаб беради.

Мазкур ўқув-машғулот йиғинларига 24 нафар ўсмирлар ҳамда 26 нафар қизлар жалб этилган. Ёш спортчиларимизнинг машғулотларини эса нақд 10 нафар малакали тренерлар назорат қилиб боришмоқда.

Ўқув-машғулотлар йиғини Ўзбекистон гандбол федерацияси ҳамда ҳомий ташкилотлар ёрдамида ташкил қилиниб, спортчиларга барча шароитлар, жумладан замонавий спорт мажмуалари, тренажёр зали, бассейн, ётоқхона, фармакология ҳамда бўш пайтларида маданий ҳордиқ чиқариши учун шароитлар яратиб берилган.

Ўқув-машғулот йиғинидан сўнг ҳар иккала жамоа 21-27 май кунлари Нукус шаҳрида ўтказиладиган Ўзбекистон кубоги баҳсларида иштирок этиши режалаштирилган.

Эслатиб ўтамиз, Ўзбекистон гандбол федерацияси ўсмирлар III ёзги Осиё ўйинларига пухта ҳозирлик кўриш мақсадида ўсмирлар ва қизлар терма жамоаларини мамлакат чемпионати ва Кубоги мусобақаларида конкурсдан ташқари қатнашишига рухсат берган.