Германияда ҳали мағлубиятга учрамаган боксчи ўлдириб кетилди

Ҳодиса 10 июнь, сешанба куни Берлиннинг Гезундбруннен туманидаги вокзалда юз берган. Юсупов ўша ерда ким биландир тортишиб қолган ва низо пайтида бўйнига пичоқ билан зарба берилган. Спортчи вафот этган. Бошқа тафсилотлар ҳозирча ошкор қилинмаган.

WBC (Жаҳон бокс кенгаши) ушбу фожиага муносабат билдирди: 

"WBC Абу Юсуповнинг вафотидан қайғуда. Унинг ортида рафиқаси ва уч нафар ёш фарзанди қолди. Абунинг меҳнатсеварлиги ва боксга бўлган муҳаббати унинг изини спортда абадий қолдиради. Бутун WBC оиласи ва президент Маурисио Сулейман Юсуповнинг оиласи ва яқинларига чуқур ҳамдардлик билдиради".

Юсупов профессионал рингда Германия байроғи остида жанг қилган. У 2020 йили дебют қилган ва охирги жангини 2025 йил январда Грузия вакили Георгий Канделакига қарши ўтказиб, ҳакамлар қарор билан ғалаба қозонганди.