"Global Chess League". Синдаров дуранг билан бошлади, бугун Абдусатторов ҳам баҳсларга киришади

Кеча мусобақа доирасида дастлабки кун беллашувлари ўтказилди. Унда ҳамюртимиз Жавоҳир Синдаров ўйнаётган "UpGrad Mumba Masters" жамоаси "Triveni Continental Kings" жамоасига қарши ўйин ўтказди ва 3:3 ҳисобида дуранг қайд этилди. Жавоҳир Синдаров тур доирасида даниялик Йонас Бал Бьеррега қарши ўйнади ва дурангга эришди. 

Нодирбек Абдусатторов ўйнаётган "Balan Alaskan Knights" эса мусобақани бугун "SG Alpine Warriors"га қарши бошлайди. Нодирбек мазкур қарама-қаршиликда 2-столда ҳиндистонлик Гукешга қарши ўйнайди. 

Бугун шунингдек 2-турда ҳар икки ҳамюртимизнинг жамоалари ўзаро тўқнаш келади. Унда Абдусатторовга россиялик Александр Гришук рақиб бўлади. Синдаров эса ҳиндистонлик Раунак Садвани билан ўзаро ҳисоб-китоб қилади.