Grand Chess Tour: Синдаровда ниҳоят ғалаба, қора доналарда пешқадамлардан бири таслим этилди

Дунёнинг кўзга кўринган гроссмейстерлари иштирок этаётган турнир классик шахмат йўналишида 9 турдан иборат айланма тизимида ўтказиляпти. Жавоҳир Синдаров ниҳоят, 7-турга келиб илк ғалабасини қўлга киритди. Бунга қадар у 5 дуранг ва 1 мағлубият қайд этганди. 

Жавоҳир еттинчи турда қора доналарда ўйнаганига қарамай, пешқадамлардан бири германиялик Винсент Кеймерни мағлубиятга учрата олди. Бу турдаги ягона ғалаба ҳам айнан Синдаровга тегишли бўлди. Қолган тўртта партияда томонлар муроса йўлини танлашди. 

Саккизинчи тур олдидан турнир жадвалида америкалик Уэсли Со 4,5 очко билан якка пешқадамлигини сақлаб қолди. Фабиано Каруана, Рамешбабу Праггнанандҳа ва Максим Вашье-Лаграв 4 очко билан Топ-4`дан жой олган. Кечаги ғалабаси эвазига Жавоҳир 3,5 очко билан қўшимча кўрсаткичларга кўра 8-поғонадан 5-ўринга кўтарилиб олди. Синдаровдан енгилган Винсент Кеймер ҳам 3,5 очкога эга ва у 6-ўринни банд этган. Левон Аронян ва Сэм Севьян ҳисобида ҳам 3,5 очкодан бор. Аниш Гири 3 очко билан 9-ўриндан жой олган бўлса, 1,5 очкога эга Йорден ван Форест сўнгги 10-ўринда бормоқда.   

Бугун 8-турда Жавоҳир Синдаров оқ доналарда айнан аутсайдер Йорден ван Форестга қарши баҳс олиб боради. Бугунги учрашувлар ҳам бизнинг вақт билан соат 22:00да бошланади. 

Тўлиқ иштирокчилар таркиби: Жавоҳир Синдаров (Ўзбекистон), Фабиано Каруана (АҚШ), Прагнанандҳаа Рамешбабу (Ҳиндистон), Уэсли Со (АҚШ), Левон Аронян (АҚШ), Аниш Гири (Нидерландия), Винсент Кеймер (Германия), Максим Вашье-Лаграв (Франция), Йорден ван Форест (Нидерландия), Сэм Севьян (АҚШ).