Grand Chess Tour: Super Chess Classic Romania 2026. Синдаров иштирокидаги партия меҳмонхона номерида ўтказилди

Мусобақада юқори рейтингга эга ўн нафар гроссмейстер бош соврин учун кураш олиб боряпти. Улар орасида "Номзодлар турнири" ғолиби Жавоҳир Синдаров ҳам бор. Ҳамюртимиз 5-турда қора доналарда аутсайдер, франциялик Алиреза Фирузджага қарши баҳс олиб борди. Учрашув ноодатий тарзда ўтказилди. Бунга Алирезанинг оёғидан олган жароҳати сабаб бўлди. Фирузджанинг меҳмонхонадаги номерида ўтган учрашувда дуранг натижа қайд этилди. 

Эътиборлиси, 5-турнинг қолган барча партияларида ҳам дуранг натижа қайд этилди. Пешқадам Винсент Кеймер қора доналарда нидерландиялик дуранглар қироли Аниш Гири билан муросага келди. 

Олтинчи тур олдидан германиялик гроссмейстер Винсент Кеймер 3,5 очко билан карвонбошилигини давом эттирмоқда. Аниш Гири 3 очко билан қўшимча кўрсаткичларга кўра иккинчи ўринни эгаллаб турибди. Ғалаба қозонганида айнан у пешқадамга айланиб оларди. Йорден ван Форест ва Рамешбабу Праггнанандҳа ҳисобида ҳам 3 очко бор. Жавоҳир Синдаров 2 очко билан қўшимча кўрсаткичларга кўра 8-поғонадан жой олган. Руминиялик Богдан-Даниэль Дик 1,5 очко билан 9-ўриндан жой олган бўлса, аутсайдер Алиреза Фирузджа ҳисобида 1 очко бор. 

Олтинчи турда Жавоҳир Синдаров қора доналарда ўзи сингари 2 очкога эга америкалик Фабиано Каруанага қарши баҳс олиб боради. Бугун турнирда дам олиш куни, эртанги учрашувлар ҳам бизнинг вақт билан соат 18:00да бошланади. Чемпион 100 000 долларни қўлга киритади.