Grand Slam Paris 2019. 21та давлат камида битта бронза медалига эга бўлди 

Икки кун давом этган Paris Grand Slam 2019 мусобақасида сайёрамизнинг 5та қитъасидан 98 давлатнинг жами 609 нафар дзюдочилари татамига чиқишди. Жами 14та вазн тоифасида ғолиб ва совриндорлар номи маълум бўлди.  

Медаллар жамғариш бўйича Япония терма жамоаси яққол пешқадам бўлди. Дзюдо ватани вакиллари 5та олтин, 3та кумуш, 7та бронза, жами 15та медал қўлга киритишди. Кунчиқар юрт дзюдочиларида 3та бешинчи ўрин ҳам бор. 

Франция терма жамоаси иккинчи бўлди. Мезбонлар 2та олтин, битта кумуш, 2та бронза медалига эга чиқишди. Кучли учликка 2та олтин ва 3та бронза медали билан Жанубий Корея терма жамоаси дзюдочилари якун ясашди.

Шунингдек, Грузия, Канада, Германия, Куба ва Руминия терма жамоалари таркибида ҳам бир нафардан олтин медал соҳиби бўлди. Жами 21та давлат терма жамоасига камида битта бронза медали билан ватанга қайтиш насиб этди. 

Маълумот учун, Ўзбекистон терма жамоаси ушбу мусобақада иштирок этмади. Айни пайтда дзюдочиларимиз Тошкент вилоятининг Бўстонлиқ туманида Дюссельдорф шаҳрида ўтказиладиган “Катта Дубулға” турнирига ҳозирлик кўришяпти.