Гусков октябрь ойида жанг ўтказадими? Богданнинг ўзи бу саволга жавоб берди

"Ҳозирча жанглар йўқ. Октябр ойида бўлиб ўтадиган UFC 333 турнирида иштирок этишни режалаштирган эдим, аммо айнан кучли бешлик (топ) вакилларидан рақиб топилмади. Ҳозирча бошқа рақиб билан жанг қилишда мантиқ кўрмаяпман. Бироз дам оламан, чунки январь ойидан бери қаттиқ меҳнат ва оғир режимда ишладим, битта жанг ҳам ўтказдим. Қайта қувватланиб олишим керак.

Ўтган йили Вегасда йилнинг якуний турнирида жанг қилгандим — балки бу йил ҳам ўша ерга борарман", — дея Гусковнинг сўзларини келтирмоқда "Sovsport" нашри.

Гусковнинг сўнгги жанги шу йил 25 июль куни Абу-Дабидаги UFC Fight Night турнири доирасида бўлиб ўтди. Оқшомнинг асосий жангида у Магомед Анкалаевга бешинчи раундда техник нокаут эвазига мағлуб бўлган эди.

Маълумот учун, Богдан Гусков ўз фаолияти давомида аралаш яккакурашлар (ММА) бўйича 18 та ғалаба, 4 та мағлубият ва 1 та дуранг қайд этган. У UFC`да 2023 йилдан буён иштирок этиб келмоқда.