Ҳакамлар "харом" қилган Олимпиада. Хушини йўқотган каратэчи Олимпиада чемпиони бўлди

Хусусан, ҳакамлар Япония миллий спорт тури бўлгани учун илк бор Олимпиада дастурига киритилган каратэ мусобақасида ҳам "калла" қўйишди.

Карате-кумите мусобақасининг +75 килограмм вазн тоифаси чемпионлик тақдирини айнан ҳакамларнинг қарори ҳал қилди. Финал баҳси бошланишидан бир дақиқа ўтиб, саудиялик Тарег Хамеди 4-1 ҳисобида олдинда бораётганди. Айнан шу вазиятда у эронлик Сажаду Гянжзаданинг бошига оёқда зарба берди ва рақибини нокаутга учратди. 

Хамеди ғалабасини тантана қилишга чоғланган бир паллада ҳакамлар катта саҳнага чиқишди. Шифокорлар хушсиз ётган Гянжзадани кислород ёрдамида замбилда залдан олиб чиқиб кетишди. Ҳакамлар эса узоқ давом этган маслаҳатлашувдан сўнг Сажад Гянжзадани +75 кг вазнда биринчи Олимпиада чемпиони деб эълон қилишди. Уларнинг фикрича, Тарега Хамеди рақибига тақиқланган зарба йўллаган. Бу эса унинг дисквалификациясини таъминлади. 

Ҳакамларнинг қарорини эшитган Хамеди татамини кўзида алам ёши билан тарк этди. Хушига келган Гянжзада эса Олимпиада чемпиони бўлганини эшитиб, кўзларига ишонмади.  

"Олимпиаданинг олтин медалини қўлга киритганимдан хурсандман. Лекин айнан бу йўл билан чемпион бўлганимдан хафаман", - деган Гянжзада финалдан кейинги матбуот анжуманида.