08 сен 08:59
Янгиликлар

Бокс/ММА

Ҳамюртимиз Россияда чемпионлик камарини ҳимоя қилди

Россия Федерациясининг Екатеринбург шаҳрида навбатдаги профессионал бокс кечаси бўлиб ўтди.

Оқшомнинг марказий жангида ҳамюртимиз Равшанбек Умурзоқов ўзига тегишли WBA Asia чемпионлик камарини ҳимоя қилди. Унинг рақиби филиппинлик Ролдан Алди бўлди.

Ўн раунддан иборат ушбу чемпионлик жанги тўлиқ давом этди ва ғолиб очколар ҳисобига кўра аниқланди. Уччала ҳакам ҳам бир овоздан 98:91, 97:92, 98:91 ҳисобидаги ғалабани чарм қўлқоп устамизга тақдим этди.

Равшанбек ўзининг 10-жангида 10-ғалабасига эришди. Еттита жангда рақибларини муддатидан аввал нокаутга учратган. 25 ёшли Ролдан эса 23-жангида рингга чиқди. Ҳисобида 14 та ғалаба, 7 та мағлубият ва битта дуранг бор эди. Кеча оқшом саккизинчи мағлубиятини қабул қилиб олди.