Ҳасанбой Раҳимов ва Магомед Ибрагимов 1/4 финалда, Аҳмедовада ҳам ғалаба

Бу Париж-2024 Олимпиадаси учун сўнгги лицензион турнир ҳисобланади. Баҳсларга биринчи бўлиб киришган юнон-рум курашчиларимизнинг ҳар иккиси (Маҳмуд Бахшиллоев ва Жалгасбай Бердимуратов) бу имкониятдан фойдалана олмаганди. Аёллар ва эркин курашдаги икки нафардан вакилимиз Олимпиада йўлланмаси учун курашни давом эттирмоқда. 

-97 кг вазнда энг тажрибали курашчимиз, Рио-2016 Олимпиадасининг бронза медали совриндори, 39 ёшли Магомед Ибрагимов квалилифкация раундида франциялик Адлан Висхановни мағлубиятга учратган эди. Ҳамюртимиз муросасиз кечган 1/8 финалда мўғулистонлик Ганҳуяг Ганбаатардан 2-1 ҳисобида устун келди. Энди Ибрагимов 1/4 финалда германиялик Эрик Тиелега қарши гиламга чиқади. 

-125 кг вазндаги полвонимиз Ҳасанбой Раҳимов ҳам лицензион турнирнинг чорак финалига йўл олди. У квалилифкация раундида албаниялик Парис Карепини 3-0 ҳисобида мағлубиятга учратганди. Раҳимов 1/8 финалда япониялик Таики Ямамотодан 7-1 ҳисобида устун келди. Ҳасанбойнинг 1/4 финалдаги рақиби Қирғиз Республикаси курашчиси Аял Лазарев бўлади. 

Шунингдек, бугун Лайлохон Собирова ва Шоҳида Аҳмедова ҳам Олимпиада чиптаси учун курашни давом эттиришади. Улар плей-офф босқичида ўз имкониятларини синовдан ўтказишади. -53 кг вазндаги Аҳмедов плей-оффнинг иккинчи босқичида австриялик Олександра Когутни 6-1 ҳисобида енгди. Бироздан сўнг у венгриялик Сзталвира Орсусга қарши гиламга чиқади. 

Кеча ярим финалда икки очко фарқи билан ютқазиб, тўғридан-тўғри йўлланмани қўлга кирита олмаган -57 кг вазндаги Лайлохон Собирова италиялик Аурора Руссога қарши баҳс олиб боради. Олимпиада лицензиясини қўлга киритиш учун Аҳмедовагаям, Собировагаям иккита ғалаба зарур бўлади.