“Ҳумо” бош мураббийи: “Биз учун плей-офф мавсумнинг илк ўйинидаёқ бошланганди”

Муҳташам “Ҳумо Аренада”, олти ярим мингга яқин мухлис кўз ўнгида ўтган баҳсда хоккейчиларимиз Пекиннинг “ОРДЖИ” клубидан 5:2 ҳисобида устун келишди. Учрашувдан сўнг ўтказилган матбуот анжуманида “Ҳумо” клуби бош мураббийи Евгений Попихин ўз таассуротлари билан ўртоқлашди.

- Йигитларга катта раҳмат! Улар бугун ажойиб ўйин намойиш этишди. Учрашув қийин бўлишини, лекин шу билан бирга уйда деворлар ҳам ёрдам беришини билгандик. Бизда ягона мақсад бор эди – ғалаба! Хоккейчиларимиз бу вазифани уддалашди. Албатта, беш дақиқалик четлатиш яхши бўлмади. Бундай ҳолатларга йўл қўймаслик керак. Энг муҳими, икки очкони қўлга киритдик ва юришни давом эттирамиз. 

- Ажойиб ўйин ва ўйлашимча, “Ҳумо Арена”даги энг чиройли учрашувга гувоҳ бўлдик. Уччала звено ҳам яхши ўйнади. “Ҳумо Арена”нинг жамоамизга ғалаба келтиришда муҳим омил бўлаётганига ва бундан кейин ҳам зафарли юриш давом этишига ишонсак бўладими? 

- Биз ғалаба қозониш учун ҳамма ишни қиламиз. Лекин ўйиндан ўйиннинг фарқи бўлади. Мана Самарадаги ўйинда устунликка эга бўла туриб, ғалаба қозона олмадик. Биз уйда ўйнаймизми, сафардами, бунинг аҳамияти йўқ. Музга ягона мақсад – ғалаба илинжида тушамиз. Бошқа йўлимиз йўқ! Биз учун плей-офф мавсумнинг илк ўйинидаёқ бошланганди. Шу ўринда “ОРДЖИ” жамоаси ҳақида жуда илиқ фикрларни айтган бўлардим. 

- Биринчи бўлимда Валуйский порлади. Нафақат ўз голи билан, балки ассистенлиги билан ҳам ёдда қолди...

- Дарвоқе, Валуйскийнинг оиласи Тошкентга келди. Рафиқаси ва ширингина қизчаси энди унинг ёнида. Шу сабабдан ҳам унга ўйин олдидан айтдим: сен бугун ёмон ўйнай олмайсан!”