"Ҳумо" жамоасининг "Бейбарис"га қарши серия доирасидаги учинчи ўйини 16 март куни бўлиб ўтади

Хабарингиз бор, кеча Тошкентнинг "Ҳумо" хоккей клуби Қозоғистон Очиқ чемпионати ярим финали доирасида "Бейбарис"га қарши иккинчи уй ўйинини ўтказган эди.

Жамоамиз қозоғистонлик рақибларига қарши иккита учрашувнинг бирида мағлуб бўлган бўлса, иккинчисида ғалаба қозониб, сериядаги мувозанатни тиклаган эди.

"Қанотлилар" эндиликда "Бейбарис"га қарши сафар ўйинлари сериясини бошлайди. Учрашувлар 16-17 март кунлари 19:00 да ўтказилади.

Шунингдек, ярим финалнинг яна бир учрашувида "Сариарка" жамоаси "Номад"га қарши ўйинлар сериясини олиб бормоқда. Мазкур ўйиндаги серияда ҳам ҳисоб ҳозирча 1:1.