"Ҳумо"нинг "Ҳумо Арена"га қайтиши қандай якунланди?

"Қанотлилар" мавсумнинг "Ҳумо"нинг асосий аренасидаги илк ўйинларини Қозоғистоннинг "Актобе" клубига қарши ўтказди. Бунгача "Ҳумо" рақибларини кичик аренада қабул қилиб келаётганди. 

Афсуски, қайтиш омадсиз чиқди. "Ҳумо" актобеликларга 2:4 ҳисобида ютқазиб қўйди. Муз эгаларининг икки голига Артур Кузнецов ва Александр Шевченко муаллифлик қилди. Бу билан "Ҳумо"нинг тўртта ўйиндан иборат ғалабали сериясига барҳам берилди. 

Кеча икки жамоа ўзаро ўн биринчи маротаба тўқнаш келишди. "Актобе" бешинчи ғалабасини тантана қилди. "Ҳумо"нинг ўзаро ўйиндаги ғалабалари 6 талигича қолди. 

Бугун "Ҳумо" ва "Актобе" жамоалари ўртасидаги иккинчи учрашув ўтказилади. Бугунги ўйин ҳам соат 19:30 да бошланади. "Ҳумо" Қозоғистон чемпионати турнир жадвалида 21 очко билан 6-ўринни эгаллаб турибди. "Актобе" эса 16 очко билан 9-поғонадан жой олган.