"Ҳумо"нинг навбатдаги уй ўйинлари серияси бошланмоқда. Қозоғистон клублари Тошкентда меҳмон

Тошкентликлар чемпионатдаги 39 ўйиндан сўнг "Конференция 1"да 7-ўринни эгаллаб турибдилар. Бу эса плей-офф босқичида курашни давом эттириш учун етарли. Янги йилнинг дастлабки тўртта ўйини турнир жадвалидаги ўринларни яхшилаб олиш учун яхшигина имкониятдир. 

Янги йил олдидан "Ҳумо" КХЛнинг "Сибир" жамоаси билан ҳамкорлик борасида келишувга эришди. Новосибирскдан серқуёш Ўзбекистонга икки нафар маҳоратли хоккейчи ташриф буюриши мумкин. Шунингдек, яқинда "Ҳумо"ни тарк этган дарвозабон Павел Нечистовск ўрнига ҳам янги дарвозабонни кўриб қолишимиз мумкин. Тошкентликлар таркибида бетакрор Роман Смирягин бор. У яқиндагина ВХЛ доирасида ҳафта дарвозабони унвонига сазовор бўлди. Аммо, плей-оффда иштирок этишни мақсад қилган жамоага икки нафар яхши дарвозабон керак бўлади. 

Эртага "Ҳумо Арена"га ташриф буюрадиган мухлисларни нима кутмоқда? Маълумки, ҳар бир ўйин олдидан аренага фахрий меҳмонлар ташриф буюришади. Бу сафар эса "Ҳумо"да Сабина Мустаева меҳмон бўлади. 

7 январь куни эса тадбирлар "Ҳумо. Болалар" шиори остида ташкил этилади. Ҳарбий оркестр иштирокида давлат мадҳиясини эшитишга нима дейсиз? Совғалар, танловлар ва сюрпризларгачи?

"Ҳумо Арена"да яқин орада бўладиган ўйинлар:

5 январь, якшанба, 17:00: "Ҳумо" - "Металлург" (Новокузнецк)

7 январь, сешанба, 19:30: "Ҳумо" - "Торпедо (Уст-Каменогорск)

9 январь, пайшанба, 19:30: "Ҳумо" - "Номад" (Нур-Султон)

11 январь, шанба, 17:00: "Ҳумо" - "Сариака" (Караганда). 

Қишки таътил давомида "Ҳумо Арена"га ташриф буюринг ва ҳақиқий хоккей байрамига гувоҳ бўлинг!