Ҳумоюн Султонов Калабурагида муваффақиятли старт олди

Мукофот жамғармаси 25 000 АҚШ долларини ташкил қилувчи турнирда ҳамюртимиз Ҳумоюн Султонов ҳам ўз маҳоратини намойиш этяпти. Мамлакатимизнинг биринчи ракеткаси M25 тоифасига кирувчи ушбу турнирда биринчи рақам остида сараланган. 

Султонов илк давра учрашувида ҳиндистонлик Вишу Варданга қарши кортга чиқди. Бироз аввал якунига етган баҳсда Ҳумоюн биринчи сетда жиддий қаршиликка дуч келди. Баҳс тақдири тай-брекда ҳал бўлди. Иккинчи сетда эса теннисчимиз рақибини деярли сезмади. Бир юз бир дақиқа давом этган учрашувда вакилимиз 7/6(6), 6/1 ҳисобида зафар қучди.   

Таққослаш учун, Султонов ATP рейтингида 230, Вардан 1165-поғонадан жой олган. Эртага Ҳумоюн 1/8 финалда яна бир ҳинд теннисчиси Сринивасан Коданчага қарши кортга чиқади. Сринивисан рейтингнинг 1781-поғонасини банд этган.