Икки шахматчимиз юз фоизлик натижа билан кучли учликда (барча натижалар)

Бу йил ўз тарихида 18-маротаба ташкил этилаётган, мукофот жамғармаси 75 000 АҚШ долларини ташкил қилувчи турнир швейцарча тизимда 10 турдан иборат бўлади. Иштирокчилар икки гуруҳда совринли ўринлар учун баҳс олиб боришяпти. Асосий ҳисобланган А гуруҳида 1800 ва ундан юқори рейтингли шахматчилар жам бўлган. В гуруҳида эса рейтинги 1999 ва ундан паст бўлган иштирокчилар дона сурмоқда. 

Кучлилар жам бўлган А гуруҳида ҳиндистонлик халқаро гроссмейстер Ниҳал Сарин (2687) биринчи рақам остида сараланган. У 3-турда қирғизистонлик Залкар Курбанбаевдан устун келди. Иккинчи рақамли шахматчи сифатида таснифланган ёш гроссмейстеримиз Шамсиддин Воҳидов (2670) ниҳоят биринчи ғалабасини қўлга киритди. Кетма-кет икки дурангдан сўнг у қора доналарда қозоғистонлик Султанбейбарис Думанулини мағлубиятга учратди. 

Учинчи турдан кейин 2 нафар шахматчимиз Абдумалик Абдусалимов ва Ҳумоюн Бегмуратов юз фоизлик натижа билан пешқадамлар сафида боряпти. Алмас Раҳматуллаев,  Сайидакбар Сайдалиев ва Муҳаммадзоҳид Суяров бу турда илк бор очко йўқотишди. Суяров оқ доналарда венгриялик гроссмейстер Санан Сюгиров (2631)га имкониятни бой бериб қўйди. Сайдалиев қора доналарда сингапурлик гроссмейстер Тин Жингяо (2597) билан дуранг қайд эта олди. 

Абдумалик Абдусалимов ўзбек дербисида Алмас Раҳматуллаевни оқ доналарда мағлуб эта олди. Ёш шахматчимиз Ҳумоюн Бегмуратов (2430) оқ доналарда FIDE байроғи остида ўйнаётган Рудик Макарянни ютди. Гроссмейстеримиз Муҳиддин Мадаминов (2550) ҳиндистонлик Сваминатан Сумиядан устун келди. Гроссмейстерларимиздан бири Ортиқ Ниғматов (2501) иккинчи ғалабасини қўлга киритди. У оқ доналарда ҳаракат қилиб, россиялик Грегорий Кочикяндан устун келди. 

Учинчи турдан сўнг уч шахматчи юз фоизлик натижа билан турнир жадвалида пешқадамлик қиляпти. Венгриялик гроссмейстер Санан Сюгиров (2631) қўшимча кўрсаткичларга кўра 1-ўринни эгаллаб турибди. Ҳумоюн Бегмуратов ва Абдумалик Абдусалимов 3 очко билан кучли учликни якунлашган. Жами 26 нафар шахматчи ҳисобида 25, очкодан бор. Бугун 4-тур учрашувлари соат 15:00да бошланади.