02 май 13:16
Янгиликлар

Бокс/ММА

Илия Топурия: "Оқ уйда бошқа Илияни кўрасиз"

Енгил вазнда амалдаги UFC чемпиони Илия Топурия америкалик Жастин Гэтжига қарши бўлажак жангига алоҳида кайфият билан ёндашаётгани ва мухлисларга янги "Эль Матадор"ни кўрсатишга тайёрлигини маълум қилди.

Испан-грузиялик жангчининг сўзларига кўра, у бутун фаолияти давомида биринчи марта октагонга ўзининг ва оиласининг келажагини таъминлаш зарурати билан боғлиқ босимсиз чиқмоқда.

"Умримда биринчи марта ҳаётим у ерда нима содир бўлишига боғлиқ бўлмаган ҳолатда октагонга чиқаман. Худога шукрки, у менга барқарорлик берди, бунда на мен, на болаларим ҳеч қачон муҳтож бўлмаймиз. Яъни, менда оила билан боғлиқ босим бўлмайди. Оқ уйдаги турнирда бошқа Илияни кўрасиз. Бу санъатдан чинакамига завқланадиган одамни", - деди Топурия Хорхе Эброга берган интервьюсида.

Илия Топурия ва Жастин Гэтжи ўртасида енгил вазн тоифасидаги чемпионлик жанги 14 июнь куни Оқ уй яқинида бўлиб ўтадиган UFC байрам турнирининг асосий воқеаси бўлади.