Индиан-Уэлльс. Жаҳоннинг саккизинчи ракеткаси стартдаёқ ютқазиб қўйди

Чехиялик теннис маликаси WТА рейтингида 71-ўринни эгаллаб турган черногориялик Данка Ковиничга 6/2, 5/7, 4/6 ҳисобида мағлуб бўлди. Учрашув 2 соату 29 дақиқа давом этган. 

Ўйин давомида 29 ёшли Плишкова 11 та эйс зарбани амалга оширди, тўпни ўйинга киритишда етти марта хатога йўл қўйди ва олтита брейк-пойнт қайд этди. 27 ёшли Ковинич эса уч марта эйсни амалга ошириб, еттита қўшхатога йўл қўйди ва олтита брейк-пойнтга эга бўлди. Бу теннисчиларнинг биринчи расмий учрашуви эди.

Ковиничнинг Индиан-Уэлльс турниридаги навбатдаги рақиби россиялик Людмила Самсонова ёки америкалик Энн Ли бўлади.