Ислам Махачев қайтмоқда: жанг санаси ва манзили маълум

Ислам Махачев кутилганидек жиддий жароҳат олмаган ва 11 июль куни Лас-Вегасда бўлиб ўтадиган, ҳар йили ташкил этиладиган Халқаро жанглар ҳафталигининг якуний тадбирига айланадиган UFC 330 турнирида ярим ўрта вазн тоифасидаги чемпионлик камарини ҳимоя қилади.

Бу ҳақда TMZ Sports нашрига берган интервьюсида россиялик жангчининг менежери Али Абдел-Азиз хабар берди. Али шунингдек, ўз мижозининг Илия Топурияга қарши жанги нега ўтказилмаганига ҳам изоҳ берди.

"Менга Илиянинг Ислам билан жанги бўйича қўнғироқ қилишди. Куннинг иккинчи ярми эди, Ислам ухлаб ётар эди. Аммо кейинроқ менга қўнғироқ қилиб, "Унут, бу жанг бўлмайди" дейишди. Ва бу мен Ислам билан гаплашишга улгурмасимдан олдин содир бўлди. Мен жангдан воз кечишнинг кўплаб усуллари борлигини биламан. Масалан, "Мен Фрэнсис Нганну билан жанг қиламан, менга 50 миллион доллар беринг" дейиш.

Мен ҳеч кимни иложи борича кўпроқ пул ишлаш истагида айбламайман, чунки Илия ва Ислам ўртасидаги жанг UFC ташкил қила оладиган энг катта жанг деб ҳисоблайман. Менимча, бу жанг шу йилнинг ўзида бўлиб ўтиши керак.

Шундан сўнг Исламга ярим ўрта вазн тоифасида яна бир жанг - оқшомнинн асосий жанги сифатида таклиф қилинди. Махачев "Келинглар, буни июль ойида амалга оширайлик" деди. Унинг қўлида жароҳат билан боғлиқ баъзи муаммолари бор, бу ҳақда Дана айтиб ўтди. Аммо ҳар қандай ҳолатда ҳам Исламнинг ёзда биринчи рақамли ярим ўрта вазн тоифасидаги даъвогар билан жанги бор. Келишув аллақачон тузилган ва UFC тез орада бу ҳақда эълон қилса керак", - деди Абдел-Азиз.

Айни пайтда Ислам Махачевга қарши жанг ўтказиш учун ирландиялик Иан Мачадо Гарри, эквадорлик Майкл Моралес ва нигериялик Камару Усман номзод бўлиб турибди. Бундан ташқари, 11 июль куни ярим ўрта вазн тоифасида жанг ўтказишни режалаштираётган Конор Макгрегор ҳам октагонга қайтиши ҳақида маълумотлар бор.

Агар Абдел-Азизнинг хабаридан келиб чиқсак, ярим ўрта вазнда биринчи рақамли даъвогар собиқ чемпион Жек Делла Маддалена бўлиб турибди.