Ислам Махачев: "Рақиб аниқ, лекин шартнома йўқ!"

У аллақачон бўлажак чемпионлик ҳимоя жангига тайёргарликни бошлаб ҳам юборган.

"Рақиб оғзаки маълум, аммо ҳозирча ҳеч қандай тасдиқланган келишувлар, имзоланган шартномалар йўқ. Мен аллақачон Кисловодскда, ўрта баландликдаги тоғларда асосий тайёргарлик босқичини бошладим, катта жамоа билан тайёргарлик кўряпмиз", - деди россиялик аралаш яккакураш устаси Кисловодскда журналистлар билан суҳбатда.

Шунингдек, ташкилотнинг вазн тоифасидан қатъи назар энг яхши жангчиси нима учун Оқ уй турнирида Илия Топурия билан жанги ўтказилмаганини айтди.

"Мен аллақачон бу ҳақда пост жойлаганман. Менга қўнғироқ қилишди, жангни тасдиқлашди, лекин шартнома юборишмади. Мен оғзаки розилик бердим. Эртаси куни қўнғироқ қилиб, рақиб катта гонорар сўрагани ва UFC унга рад жавобини берганини айтишди - бу энди долзарб эмас. Ҳаммаси шундай бўлди", - дея тушунтирди Махачев.

Маълумотларга кўра, Ислам Махачев 15 август куни Филадельфияда бўлиб ўтадиган UFC 330 турнирида октагонга қайтади. Унинг рақиби дивизион рейтингида иккинчи ўринни эгаллаб турган ирландиялик Йен Мачадо Гэрри бўлади.