Ислам Махачев UFC’даги навбатдаги жанги санасини тасдиқлади

У 15 август куни Филадельфияда бўлиб ўтадиган UFC 330 турнирида октагонга кўтарилади. Бу ҳақда россиялик чемпион Каспийскда кураш бўйича Доғистон ва Осетия терма жамоалари ўртасидаги ўртоқлик учрашувида Вячеслав Абдусаламовга берган интервьюсида айтиб ўтди, бироқ рақиби номини очиқламади.

"Тўғрисини айтсам, августда бўлишини биламан, лекин рақиб ҳақида ҳали юз фоиз амин эмасман. Мураббийлар жамоасидан кўнглим тўқ ва мен аллақачон яхши спорт формасига кириб бориш жараёнидаман", - деди Махачев.

Айни пайтда Махачев билан жанг қилиш учун энг эҳтимолий даъвогарлар ирландиялик Иан Мачадо Гэрри ва эквадорлик Майкл Моралес бўлиб турибди. Махачевнинг бразилиялик Карлос Пратес билан жанги ҳам истисно эмас. Аввалроқ, чемпионлик жангига яна бир потенциал номзод сифатида нигериялик Камару Усман айтилганди.