Исломбек Исмоилов: "Биз фақат Роналдуга эмас, балки бутун "Ал Насср" жамоасига қарши ўйнаймиз"

Исломбек Исмоилов:

— Ассалому алайкум! Эртанги учрашувдаги рақибимиз — Осиёнинг энг кучли жамоаларидан бири бўлган "Ал Насср". Уларнинг таркибида жаҳон футболида ўз ўрнига эга бўлган, юқори савияли ва катта тажрибага эга футболчилар тўп суришади.

Албатта, бу биз учун жуда муҳим учрашувлардан бири. Биз Ар-Риёдга шунчаки майдонга тушиб, ўйин ўтказиш учун эмас, балки муносиб натижага эришиш мақсадида келдик. Рақибнинг кучини яхши тушунамиз, шу билан бирга, ўз имкониятларимизга ҳам ишонамиз.

Эртанги баҳсда бор кучимиз, маҳоратимиз ва жамоавий бирдамлигимизни ишга соламиз. Майдонда охиригача курашиб, чиройли футбол намойиш этиш ва Фарғона ҳамда бутун Ўзбекистон халқини хурсанд қилиш учун ҳаракат қиламиз.

Икром Алибоев:

— Ассалому алайкум! Мураббийимиз таъкидлаганидек, эртага Осиёнинг энг кучли жамоаларидан бирига қарши майдонга тушамиз. "Ал Насср" нафақат таркиб жиҳатидан, балки молиявий имкониятлари ва халқаро тажрибаси билан ҳам қитъамизнинг етакчи клубларидан бири ҳисобланади.

Биз бўлажак учрашувга жиддий тайёргарлик кўрдик. Рақибнинг кучли жиҳатларини яхши биламиз ва ўз имкониятларимиздан келиб чиқиб, ўйинга тайёргарлик олиб бордик. Футболда номлар ва имкониятлар муҳим, лекин майдонда ҳар бир жамоа ўз ўйини ва кураши билан натижага эришади.

Эртага бор кучимизни ишга солиб, мухлисларимизни қувонтирадиган натижага эришишга ҳаракат қиламиз. Бизнинг вазифамиз — майдонда боримизни бериш, охиригача курашиш. Натижа эса, албатта, Аллоҳдан.

Жамоа бош мураббийига берилган саволлар:

— "Ал Насср" жамоасининг таркиби ҳақида қандай фикрдасиз?

— "Ал Насср" жуда кучли футболчилардан таркиб топган жамоа. Уларнинг индивидуал маҳорати ва халқаро тажрибаси юқори эканини яхши биламиз. Бироқ биз ҳам ўз имкониятларимизга ишонамиз. Эртанги учрашувда рақибнинг кучли томонларини ҳисобга олган ҳолда, ўз ўйинимизни намойиш этишга интиламиз. Асосий мақсадимиз — майдонда муносиб кураш олиб бориш, чиройли футбол кўрсатиш ва ижобий натижага эришиш.

— Криштиану Роналдунинг ўйинини чеклаш учун алоҳида тактика ишлаб чиқилганми?

— Криштиану Роналду — жаҳон футболининг энг ёрқин жулдузларидан бири. Унинг маҳорати, тажрибаси ва гол уриш қобилиятини алоҳида таъкидлаш мумкин. Биз унга ҳурмат билан қараймиз ва уннинг имкониятларини яхши тушунамиз. Аммо биз фақат Роналдуга қарши эмас, балки бутун "Ал Насср" жамоасига қарши ўйнаймиз. Шу сабабли асосий эътиборимиз рақибнинг умумий ўйинига, жамоавий ҳаракатларига ва майдондаги вазиятларга қаратилади. Биз учун энг муҳими — интизомли ҳаракат қилиш, мураббийлар штаби белгилаган режаларга амал қилиш ва жамоа сифатида ўз имкониятларимизни намойиш этиш.

Эслатиб ўтамиз, "Ан-Наср" — "Нефтчи" учрашуви бугун, 12 октябрь куни Ар-Риёд шаҳридаги "Ал-Аввал Парк" стадионида бўлиб ўтади.