Исроил Гран-присининг иккинчи куни ҳам медал бўлмади

-70 кг вазндаги дзюдочи қизимиз Гулноза Матниязованинг иккинчи учрашувини ўтказгани ва ярим финал йўлланмаси учун кечган баҳсда швециялик Анна Бернхолмга имкониятни бой бериб қўйгани ҳақида хабар берган эдик.

Ҳозиргина Гулноза бронза медали учун кечган баҳсларнинг дастлабкисида ирландиялик Меган Флетчерга ютқазиб қўйди ва еттинчи ўрин билан кифояланди. Энди айнан Меган бронза медали учун даниялик Эмилиэ Сукка қарши татамига чиқади.

Шу тариқа, ўзбекистонлик спортчиларнинг бугунги иштироки ўз якунига етди. Афсуски, бугун ҳам дзюдочиларимиз кунни медалсиз якунлашди. Исроил Гран-приси жорий йил ҳисобидан илк халқаро турнир бўлгани учун ҳам дзюдочиларимизнинг натижалари мураббийларимиз кутганчалик бўлмаяпти.

Гарчи бугун Гулноза Матниязова медалсиз қолган бўлса-да, Токио-2020 Олимпиадаси учун муҳим ҳисобланган 182 рейтинг очкосини қўлга киритди. Ғиёсжон Бобоев эса 112 очкога эга бўлди.

Ўзбекистон дзюдо федерацияси матбуот хизмати