Исроил Мадримов 2022 йилдаги жанглари, уйланиши ва Соро билан реванш ҳақида гапирди

Olamsport.com сайти мухбири кечада рингга кўтарилиб, суперярим ўрта вазн тоифасида WBA жаҳон чемпионлик камари учун расмий даъвогарга айланган Исроил Мадримов билан кичик интервью уюштирди.  

Мадримов  кўплаб муҳокамаларга сабаб бўлаётган Сорога қарши жанги ва келгуси режалари ҳақида гапирди.

"Тўғриси, қийин жанг бўлди. Рақибим жуда ҳам тажрибали эди. Оғир жанг бўлишини аввалдан билардик. Муҳокамаларга сабаб бўлаётган вазиятга келсак, унда менинг айбим йўқ. Чунки биз спортчилар фақатгина жанг қиламиз. Табиий ҳолки, кучли шовқинда ҳеч нима эшитилмайди ва бундай вазиятда боксчи тўхтамайди. Агарда ўша вазиятда ҳакамнинг тўхта деган ишораси бўлганида тўхтардим. Лекин, мен ҳеч қандай бонг овозини эшитмадим. Айтганингиздек, рақибнинг менежери мени дисквалификация қилинишим кераклигини айтди. Ўша пайтда жуда қаттиқ ҳаёжон ва ҳавотир бўлди. Бу жангга анча тайёргарлик кўрган эдик. Лекин Аллоҳга шукурки, ғалабамни тасдиқлаб, бу ҳакамнинг айби эканлигини тан олишди. Буларнинг барчасини яхшиликка деб биламан. 

Реванш беришга ҳеч қандай қаршилигим йўқ. Сабаби ҳар битта жанг мен учун тажриба. Ва айнан Сорога қарши реванш бўлса, яна ҳам тажриба бўларди. Биласиз, рақибим анча тажрибага эга. Бу жангдан ҳам жуда катта тажриба олдим. Шунинг учун агарда реванш бўлса, ҳеч қандай қаршилигим йўқ. Кўпчилик бонгдан кейин зарба берди деб айтиши мумкин, лекин реванш бу гапларга нуқта қўйиши мумкин ва мен бунга тайёрман. 

2022 йилда 2 та жанг ўтказишим мумкин. Чемпионлик жанги яқин бўлганлиги сабабли вақтнинг кўп қисми тайёргарликка кетади. Ҳар бир жангдан кейинги тикланиш жараёнлари ҳисобига 2 та жанг ўтказсам керак деб ўйлайман. 

Янги йилдаги режаларим ҳар тарафлама жуда ҳам катта. Инша Аллоҳ шахсий ҳаётимда ҳам, спортчилик фаолиятимда ҳам катта янгиликлар бўлади. 

2022 йилда оила қуриш режамда бор. Кейинги йилдаги режаларимнинг асосийси шу десам ҳам бўлади (кулади). Муносиб жуфтимни топсам, Худо хоҳласа тўйни бошлаймиз. Яқинда бизни биринчи қалдирғочимиз Муроджон Аҳмадалиевнинг тўйини ҳам ўтказиб олдик, жуда чиройли ва файзли ўтди. Насиб этса, давомли бўлиб, тўй-тўйга уланиб кетса жуда ҳам хурсанд бўламиз", - деди Исроил Мадримов.

Хуршида Абдикулова ёзиб олди