Исроил Мадримов билан бир ҳафта: ESPN ўзбек боксчиси ҳақида катта мақола тайёрлади

Унда боксчимизнинг ҳафталик кун тартиби ва жангга тайёргарлик жараёни ҳақида ҳикоя қилинади. Қайд этиш лозимки, трансляция масаласида рақобатчи компания - DAZN жангларида иштирок этувчи боксчи ҳақида бундай мақолалар ESPN томонидан ҳар доим ҳам ёзилавермайди. Ўзбек бокси мухлислари учун қизиқарли бўлишини инобатга олган ҳолда, Ўзбекистон бокс федерацияси матбуот хизмати ушбу мақоланинг ўзбек тилидаги кўринишини эътиборингизга ҳавола қилади. Демак, бошладик. 

Фриско, Техас штати. 29 февраль куни "The Ford Center at the Star" аренасида Майки Гарсия ва Жесси Варгас ўртасидаги жанг ўтказилди. Ушбу жанг оқшоми доирасида 25 ёшли ўзбекистонлик проспект Исроил Мадримов WBA камари учун элеминатор жанг ўтказиши ва унда Чарли Наварро билан баҳслашиши лозим эди. 

Мадримов жаҳон боксининг келажаги порлоқ проспектларидан бири сифатида кўрилмоқда. Уни ўз вақтида Тимоти Брэдли-кичик, Лукас Маттисс, Руслан Проводников каби боксчиларни тарбиялаган Жоель Диаз шуғуллантирмоқда. Диаз Мадримовни фаолияти давомида учратган энг зўр туғма истеъдод соҳиби деб атайди. 

Ўзбекистонлик Мадримов Наваррога қарши жангга 4-0 рекорди билан етиб келади (4 та ғалаба, 0 мағлубият - изоҳ). Ушбу жангдаги ғалаба Мадримовни IBF ва WBA камарлари соҳиби Жейсон Росарио, шунингдек WBA Regular камари соҳиби Эрисланди Ларага қарши бўладиган чемпионлик жангига яқинлаштирарди. 

Жанг ҳафтаси давомида ESPN боксчининг тайёргарлик жараёни, ҳусусан жамоавий овқатланиш, кечки машғулотлар, вазн ўлчаш ва "Ford Center"даги жанги кузатиб борилди. 

Чоршанба

15:27

Жангга бағишланган медиа-тадбир. Мадримов чапдан иккинчида. У ўзининг ажойиб костюми сабаб "Matchroom Boxing" промоутерлик компанияси раҳбари Эдди Хирндан илиқ сўзларни қабул қилиб олмоқда. 

18:59

Диаз ва Мадримов машғулот ўтказиш учун фитнес-марказда учрашишди. Бу сафар вазн ҳайдашда Мадримов у қадар қаттиқ ишлагани йўқ. Диазнинг айтишича, боксчи ушбу ҳафтага келиб ўзининг ўрта вазнига тушиб олган. Ушбу кечки машғулотлар формани ушлаб туриш ва танада йиғилган сув массасини туширишга мўлжалланганди. 

Диаз Мадримовнинг Cybex машинасида ўтирганида Мадримовнинг қўлини ушлаб олган. Боксчининг менежерларидан бири Алик Фролов эса бу вақтда югуриш йўлакчасида шуғулланарди. 

Исроил Мадримовнинг куч ва жисмоний тайёргарлик бўйича мураббийи Бен Эрнандес унга ёрдам бермоқда. 

19:47

25 дақиқалик машғулотдан сўнг Мадримов Диаз билан ишлаш учун ўз қўлқопларини киймоқда. Мураббий унга жанг вақтида қай тарзда нафас олиш лозимлигини тушунтирмоқда. 

"Наварро узун, у асосан чап томондан ҳаракатланади", - дейди Диаз. Улар маълум комбинацияни такрор ва такрор ишлашарди. 

Мадримов ишлаётганида Диаз боксчини Геннадий Головкин ва Василий Ломаченкога қиёслади. Унинг айтишича, Мадримов олдинга борганида мураббийни "еб қўймоқда". "Лапа" ушлаганда ҳеч қачон бошқа боксчи билан бундай ҳолат юзага келмаганди. 

Мадримов якка ўзи ишлаб, орада рақс ҳам тушиб қўйярди. Бу бир неча раунд давом этди. Кайфият шу даражада эдики, Мадримов ўзининг "ташриф қоғози"га айланиб улгурган сальтони ҳам амалга оширарди. 

"У гимнастика билан шуғулланган", - деди Диаз. 

Ушбу сеанс ярим соатлик чигалёзди машғулот ва Эрнандес бошчилигида Мадримовнинг мушакларига куч берувчи билан якунланди

Биринчи кун якунланди. 

Пайшанба

9:25

Мадримов машғулотни югуриш йўлакчасидаги 30 дақиқалик югуриш билан бошлади. 

Унинг жамоаси эса бир кун олдинги машғулот жараёнини таҳлил қиларди. Бу орада менежер Алик ва мураббий Бен Эрнандес ўзаро баҳслашиб қолишди. Ҳазил тариқасидаги ушбу "спор"дан сўнг бошқа бир мураббий Фернандес Мадримовнинг олдига келиб, эрталабки чигалёзди машғулотларни бажаришига ёрдамлашди. 

10:40

Жамоа аъзолари меҳмонхонадаги ўз хоналарига йўл олишди. Имкониятдан фойдаланган Диаз эса ўзининг жанговар ҳусусиятларини намоён этди. 

Сиз жанг вақтида Диазни бурчакда кўрганингизда, алоҳида белгилар орқали дарҳол таниб оласиз. У чўнтаклари кўп кийимда ва орқасига "Жоэль Диазнинг машғулот лагери" деган кийимда бўлади. Аслида ўша кийим кончиларга мўлжалланган. 

"Мен қаерда нима борлигини жуда яхши биламан", - дейди Диаз пахтадан тортиб, дориларни кўрсатар экан. Диаз ушбу кийимига шу қадар ўрганиб кетганки, жанг вақтида қайси чўнтакдан нима олиш кераклигини тезкорлик билан ҳал қила олади. Яъни, чўнтак кўплигига қарамай нарсаларини излаб ўтирмайди.

"Хонамдан чиқиб кетар эканман, барча нарса ёнимда эканлигига ишонч ҳосил қилишим лозим", - деди у. 

Унинг яна бир нарсаси бор: Фасоль учун мўлжалланган "Frito Lay" банкаси. Унга ушбу банкани афсонавий Чак Бодак совға қилган. Муз бўлаклари жанг вақтида боксчининг юзида муаммолар майдо бўлмаслиги учун яхшигина фойда беради. Унинг айтишича, ушбу идиш алюминдан тайёрланганлиги учун, музларни эритмай сақлаб қолади. Бу эса жуда муҳим. 

Бодак Диазга ишни ташкил этиш бўйича кўп нарса ўргатган. Диаз жангга йўл олар экан, унинг кийими ҳам ўзи билан бирга ҳаракатланади. Чўнтагидаги буюмларни йўлда тушириб қўйиш ёки йўқотиб қўйишга унинг умуман ҳаққи йўқ.

18:02

Куннинг асосий қисмида дам олган Мадримов ва унинг жамоаси "Omni" меҳмонхнасидаги "Cobalt Room"га етиб боришди. У ерда DAZN вакиллари боксчилар билан мулоқот қилиб, трансляция пайтида фойдаланиш учун керак бўладиган маълумотларни олишмоқда. 

Мадримов эса юқорига интилишда давом этишни истаётганини таъкидлайди. 

"Мен чемпионлик жанги сари ҳаракатланаётганимиздан хурсандман. Росариога қарши жанг қилишни жудаям истагандим".

Интервью бир неча дақиқа давом этди. Бу эса трансляция жамоаси учун шу вақт етарлилиги, Мадримов ҳозирча узоқ йўлнинг бошида эканлигини билдиради. Лекин ҳали шундай вақт келадики, у иштирокидаги интервьюлар, учрашувлар узоқ вақт давом этади. 

19:03

Мадримов машғулот залига етиб борди. Югуриш йўлакчасида эса унинг олдида бундай жараённи проф боксда 50 мартадан кўп бошидан ўтказган "Chocolatito" турарди. 

"Мен бу ерда бўлишим шарт эмас. Шунчаки мураббий бўлганим ва бу ерда бўлишим кераклиги учун шу ердаман. Исроил борасида бошқалардек ҳавотир олмасам ҳам бўлаверади", - дейди Диаз. 

Мадримов ерга ётди. Эрнандес массажёр билан, Фролов эса боксчи танасининг бошқа қисмлари билан ишлаб, унга ёрдам беришди. Бу эса машғулот якунига етаётганидан дарак берарди.

Шундан сўнг барча тарқалди.

Жума

9:27

Мадримовнинг жамоаси боксчининг меҳмонхонадаги хонасида йиғилмоқда. Боксчининг диванида эса ўзига тегишли WBA International камари ётарди. 

Оч қизил рангдаги бир-ҳил либосларни кийиб олган жамоа аъзолари пастга тушиб кетишди. Вазн ўлчаш олдидан улар ушбу мавзу борасидаги бир қанча масалаларни муҳокама қилишди. 

10:04

Мадримов 153,2 фунт вазн қайд этди. "Бу бақувват нонуштадан сўнг", - дейди Фролов. 

Мадримов 147 фунт вазнни ҳам амаллай олади. Лекин, унинг жамоаси ушбу дивизиондаги сиёсий муаммоларни яхши тушунади ва чемпионлик камарини қўлга киритиш учун биринчи ўрта вазнни энг маъқул вариант деб ҳисоблайди. 

Диаз "Star Ballroom"дан қайтгунича, Фролов ўзи билан олиб келган салатни Мадримовга бераётганди. Орада бир неча мухлислар у билан суратга тушгани келишди. 

16:14

Деярли ярим кун вақт ўтди. Боксчилар тарозидан ўтиб бўлганликларига қарамай, "Ford Center"далар. DAZN ўз тадбирларини якунлаб олмагунича, улар хеч қаерга кета олмайдилар. 

18:34

Кайфият жойида, энди барча хотиржам. Жамоа кечки овқатни тановвул қилмоқда. 

Овқатдан сўнг Мадримов ва унинг жамоаси арена атрофини айланишди. Бундай вақтда одатда кўпчилик дам олишни маъқул кўради. Аммо қон айланиши камаймаслиги учун Исроил фаолроқ бўлишга интилади.

21:15

Мадримов хонасига қайтди. Унга мевали салат олиб келиб беришди. Вазн ўлчаш маросими эрталаб ўтиб бўлди, шу сабабли боксчилар кун давомида истаганларича нарсалар ейишлиги мумкин. 

"Бу кун давомида ейилган овқатларни ҳазм қилишга ёрдам беради. Боксчилар бир неча ҳафта давомида қийналиб вазн ташлаганлари учун, тарозидан сўнг кўп овқат еб юборадилар. Бу эса ошқозон тизимида муаммоларни келтириб чиқариши мумкин. Биз эрталабгача барчаси жойида бўлишини истаймиз. 

Энди фақат бир нарса қолди - жанг қилиш!

Шанба

15:27

Сокинликда ўтган куннинг биринчи ярмидан сўнг Мадримов ва унинг жамоаси "Ford Center"га йўл олмоқда. Улар браслетлар олиш учун боришди. Бу орқали спортчилар аренага кира олишлари мумкин. 

Диаз ва Мадримов ўзлари учун белгиланган кийиниш хонасига етиб келишди. Боришганида Диего Пачеко энди етиб борган экан. Бироз ўтиб уларга Яфаи ва Харрис ҳам қўшилди. Диаз у ерда ўзлари учун маъқул жойни танлаб олди. 

Диаз идишни муз билан тўлдирди ва бир неча шиша идишда сувлар олди. 

"Бизга ўзимиз билан муз ва сувларни олиб келишга руҳсат беришмайди", - дея ҳолатга изоҳ берди Диаз. 

Мураббий турли идишдаги сувларни турли ҳароратда сақларди. Улардан бири махсус музлатилганди. "Агар боксчим жароҳат олса, уни "уйғотиб юбориш" учун боши ва бўйнига қўяман".

15:59

Мадримов - мусулмон ва кунига бир неча маротаба ибодат қилади. У ўз жойнамозини олди ва намоз ўқишни бошлади. 

Бир неча дақиқадан сўнг назоратчи қўлида иккита бўш идиш билан келиб, Мадримовдан допинг текширув учун намуналар беришни сўради. 

16:06

Диаз Мадримовни тайёрламоқда. Орқада эса Пачечо шуғулланмоқда. Мадримов жамоасининг кайфияти яхши. 

Хонага Техас спорт комиссияси пластик пакетга солинган Grant қўлқоплари билан кириб келди. Мадримов жанг вақтида айнан ушбу қўлқоплардан фойдаланади. Диаз уларга "қуроллар" деб таъриф берди. Рақиб ушбу қўлқопларни боғлашаётгани ҳақида хабар беришганида, Диаз кўриш учун Наварронинг кийиниш хонасига йўл олди. 

16:18

Мадримов DAZN журналисти Клаудия Трежесга интервью бермоқда. Диаз қайтди ва Наварронинг қай тарзда қўли боғлангани ҳақида Фроловга гапирди.

16:33

Диаз эҳтиёткорлик ва диққат билан Мадримовни қўлини бинт билан боғламоқда. Бу узоқ йиллик тажрибадан сўнг санъат асарига айланиб бўлганди. Бу вақт ичида Диаз ора-орада "Барчаси жойидами?" деган саволни бериб қўярди. 

Ушбу жараённи инспектор Артуро Мартинес ва Наварронинг вакили ҳам кузатиб турарди. 

Қўл Диаздек тажрибали мураббий томонидан боғланганида, у қурол каби бўлади. Аммо бу масъулиятли жараён - ҳар бир қадам қўлни ҳимоясини таъминлайди. 

16:44

"Бизда яна 30 дақиқа қолди", - деди Диаз.

16:49

"Бизда 20 дақиқа бор", - дея Диаз хонадагиларни огоҳлантирди. Мадримов қизиб олиш машқларини бошлади, хонада сакрай бошлади, темп ва тезликка ишлади. 

17:06

Диаз Фролов ва Эрнандесни чақириб, ринг бурчагида бажариладиган ишлар бўйича топшириқларни берди. Унга кўра Алик швабрани олади, Эрнандес эса гонгдан сўнг стулни чиқаришга жавобгар. Бу вақтда Диаз боксчининг чап томонидан рингга тушиб олади. 

Фролов Мадримовнинг танасига енгил вазилин сура бошлайди. 

17:27

Мадримовни олдига қўлқопларни текширгани келиб кетишди. 

"Биз кейингиси", - деди Фролов. Хонадагилар ҳудди босим остида эдилар. Чунки, исталган вақт уларни рингга чақириб қолишлари мумкин эди. 

17:45

Диаз Мадримов билан тезкор ҳаракатлар бўйича ишламоқда. Зарбалар натижасида чиқаётган овоз деворлардан акс-садо сифатида қайтиб келарди. 

18:08

"Тахминан икки дақиқадан сўнг чиқамиз", - деган хабар келди DAZN продюсеридан. 

Жамоа аренага чиқиш жойига етиб келди. У ерда камералар ва қўриқчилар туришарди. Мадримов эса ўзи учун белгиланган жойга ўтиб борди.

18:20

Биринчи раунд бошланди. Мадримов ҳаракатда. Орадан бир дақиқа ўтиб у чап қўл ҳужумга ўта бошлади. Наваррога зарбалар берилди. 

"Good work" (Яхши иш) деди Диаз боксчи биринчи раунддан сўнг ўз бурчагига қайтиб келар экан. Ёдда тут - финт, финт ва зарба.

18:39

Олтинчи раунд олдидан Мадримов стулга ўтирар экан, Диаз сўради: "Ўзингни яхши ҳис қиляпсанми?". Фролов эса унга қуйидаги сўзларни етказди: "У бошқа истамайди. Зарбаларни бер. У бошқа урушишни истамаяпти. Бошла Исроил. Тугатиб қўй, кеттик!".

Диаз Мадримовга сувни берар экан шундай деди: "Ишга киришамиз".

18:41

Мадримов олтинчи раундни чап қўл ҳаракати ва тўғри зарбалар билан бошлади. Ниҳоят раундга 55 сония қолганида Наварро кучли зарбани ўтказиб юборди. Оғриқ қандай бўлгани Наварронинг юзида акс этарди. Лекин, у оёққа тура олди. Бир неча сониядан сўнг ўтказилган кейинги зарбада эса у йиқилди ва Рамос жангни тўхтатди. 

Мадримов эса ринг марказига бориб, ўзининг ажойиб сальтосини кўрсатди. Наварро Мадримовга тажриба тўплашда ёрдам берди. 

Диазнинг айтишича, бу Головкин ва Ломаченконинг комбинацияси. Шунингдек, Теренс Кроуфорднинг услубидан ҳам нималардир бор. Бундан ташқари у Эмануэль Августусни ҳам эслаб ўтди. 

18:51

Кийиниш зонасига қайтгандан сўнг, Диаз Мадримовнинг қўлини бўшатди. 

Хонага промоутер Эдди Хирн кириб келди ва Мадримовни ушбу ажойиб чиқиш билан табриклади. У Исроилга ёзда Ўзбекистондаги жанг оқшомида, Муроджон Аҳмадалиевнинг ҳимоя жангида ҳам рингга чиқиши мумкинлиги ҳақида гапирди. 

Азиз Тўхтамуродов тайёрлади