Исроил Мадримов Жаҳон чемпионатида иштирок этадими? Cаволга боксчимизнинг ўзи жавоб берди

Бокс бўйича терма жамоамиз Токио Олимпиадасида қайд этган натижадан сўнг федерация раисининг биринчи ўринбосари Сакен Полатов терма жамоа эшиклари барча боксчилар учун очиқлги ҳақида гапирган ва бунинг натижасида Рустам Тўлаганов терма жамоа машғулотига чақирилганди. Айни шу вақт оралиғида проф боксда камар учун жанг қилиши кутилаётган Исроил Мадримов Ўзбекистонга қайтиб келди. 

Табиийки, мухлислар орасида Мадримов жаҳон чемпионатида иштирок этиши ҳақида фикрлар «болалади». Мухбиримиз Сарвиноз Рахмонқулова Исроил Мадримов билан боғланиб, мухлисларни қийнаётган саволга жавоб олди.

«Жаҳон чемпионатига бормайман. Мишель Соро билан жангим тасдиқланди. Жанг санаси 20 сентябрдан кейин аниқ бўлади. Тез орада тайёргарликни бошлаймиз, машғулотларнинг ҳам Ўзбекистонда, ҳам АҚШда ўтказилиши кутиляпти», - деди Мадримов.

Эслатиб ўтамиз, WBА ташкилоти Мадримов ҳамда Соро ўртасида мажбурий даъвогар мақоми учун жанг ўтказилишини тасдиқлаган.