Istanbul Open. Матчболдан чиқиб кетган Кудерметова камбэк эвазига муқаррар мағлубиятни ғалабага айлантирди

Мусобақада мамлакатимизнинг иккинчи ракеткаси Полина Кудерметова ҳам муваффақиятли одимламоқда. Вакиламиз илк даврада туркиялик Чагла Буюкакчайни ортиқча қийинчиликсиз мағлубиятга учратганди - 6/3, 6/1. 

Теннисчимиз иккинчи босқичда анча мураккаб учрашув ўтказди. Кудерметова 1/8 финалда россиялик Анастасия Гасановага қарши драматик баҳсда камбэк амалга ошира олди. Полина 3/6, 0/3 ҳисобида имкониятни бой бера туриб, ўйинга қайтишга муваффақ бўлди. Аввалига иккинчи сетни 7/5 ҳисобида ўз фойдасига ҳал қилди. Кейин эса ҳал қилувчи учинчи сетда ҳам худди шу ҳисобда зафар қучди - 7/5. 

Таққослаш учун, Полина Кудерметова айни пайтда WTA рейтингида 123, Анастасия Гасанова роппа-роса 200-ўринни эгаллаб турибди. Иккала теннисчи ҳам меъёридан ортиқ қўшхатога йўл қўйди - 10 га 8, Гасанова "фойдасига". Бу теннисчиларнинг ўзаро ўтказган иккинчи учрашуви бўлди. Иккала баҳс ҳам Полина фойдасига ҳал бўлган. Энди Кудерметова эртага, 8 май куни 1/4 финал учрашувида WTA рейтингида 256-поғонада бораётган франциялик Алисе Тубеллога қарши кортга чиқади.