Истанбул рейтинг турнирининг учинчи куни эркин курашчиларимиз учун қандай ўтди?

Афсуски, айни дақиқаларда давом этаётган мусобақанинг учинчи кунги баҳслари Ўзбекистон аёллар ва эркин кураш терма жамоаси учун омадсиз келди. Бироз аввал медаль учун сўнгги умидимиз Жасмина Иммаева ҳам рақибасига ютқазиб қўйди. 50 кг вазнда юртимиз шарафини ҳимоя қилган Ўзбекистон чемпиони бронза медали учун баҳсда болгариялик Миглена Селишкага 0-6 ҳисобида имкониятни бой берди. 

Бугун бошланган эркин кураш мусобақасида эса уч нафар вакилимиз медаллар учун баҳс олиб борди ва афсуски улар ҳам медаллар учун кураш босқичига етиб кела олишмади. Икки йиллик танаффусдан сўнг катта спортга қайтган Ҳасанбой Раҳимов 1/8 финалда германиялик Геннадий Чудиновичга 1-8 ҳисобида ютқазиб қўйди. 125 кг вазн тоифасидаги курашчимиз илк даврада қозоғистонлик Алишер Ергалидан 8-4 ҳисобида устун келганди. Ушбу вазндаги иккинчи вакилимиз Сардор Холматов эса туркиялик курашчидан 6-7 ҳисобида енгилди.   

Бугун шунингдек, 97 кг вазн тоифасидаги эркин курашчимиз Муҳаммадрасул Раҳимов ҳам мусобақада ўз имкониятини синаб кўрди. Аамалдаги Ўзбекистон чемпиони бўлган Муҳаммадрасул бронза медали йўлидаги ўтиш баҳсида қозоғистонлик Мамед Ибрагимовга 4-6 ҳисобида имкониятни бой берди.