Истомин Сеговия турнирининг асосий тўрига йўл олди

Мукофот жамғармаси 67,960 еврони ташкил этувчи Segovia Challenger турнирида ҳамюртимиз Денис Истомин ҳам ўз омадини синаб кўрмоқда. Теннисчимиз ўз иштирокини саралаш баҳсларидан бошлаганди. 

Аввалига у 1/2 финалда бразилиялик Уилсон Лейтени 5/7, 7/5, 7/5 ҳисобида мағлубиятга учратди. Кеча эса саралашнинг финалида германиялик Элмар Эюпович ҳам уч сет натижасига кўра таслим этилди. Биринчи сетни 2/6 ҳисобида бой берган Истомин ажойиб камбэкни амалга оширди. Денис кейинги икки сетда 7/6(4), 6/4 ҳисобида зафар қучиб, турнирнинг асосий тў баҳсларига йўлланмани қўлга киритди. 

Денис Истомин учрашув давомида 10 та эйс, 2 та қўшхато, Элмар Эюпович эса 6 та эйс, 7 та қўшхато қайд этди. Ҳамюртимиз саралашда 12, рақиби эса 6-рақам остида таснифланганди. Бу теннисчиларнинг ўзаро илк учрашуви эди. Бугун Истомин асосий тўрнинг илк даврасида россиялик 20 ёшли Алибек Качмазовга қарши кортга чиқади. Ушбу баҳс бизнинг вақт билан соат 16:00да бошланади.    

Таққослаш учун, ҳамюртимиз ATP рейтингида 438, Уилсон 499, Эюпович 386, Качмазов эса 345-ўринни эгаллаб турибди.