Истоминнинг Алматидаги иккинчи баҳси 59 дақиқа давом этди

Соврин жамғармаси 50 000 АҚШ долларини ташкил қилувчи ушбу турнирда ҳамюртимиз Денис Истомин биринчи рақам остида ҳаракат қиляпти. Осиё ўйинлари ғолиби турнирнинг иккинчи давра учрашувини ўтказди. Ҳозиргина якунланган баҳсдаги Дениснинг рақиби мисрлик Муҳаммад Сафват бўлди. 

Бир дақиқаси кам бир соат давом этган учрашувда Истомин рақибига ҳеч қандай имконият қолдирмади - 6:2, 6:1. Бу теннисчи кеча илк босқичда истеъдодли ҳамюртимиз Ҳумоюн Султоновни драматик кечган учрашув якунида 6:2, 4:6, 7:6, тайбрекда 7:4 ҳисобида мағлуб этганди. Истомин ўша мағлубият учун Сафватдан реванш олди.

Таққослаш учун, Денис Истомин дунё рейтингида 103, Муҳаммад Сафват эса 196-ўринни эгаллаб турибди. Теннисчилар шу кунгача ўзаро турнирларда тўқнаш келишмаганди. Бугун Денис ҳисобни очишга эришди.