ITF 2025 йил қаҳрамонларини эълон қилди

Яккалик баҳсларида Арина Соболенко ва Янник Синнер ғалаба қозонди. Беларуслик теннис маликаси бунгача 2023 йил, италиялик эса 2024 йилда мукофотни қўлга киритган эди.

Аёллар ўртасидаги жуфтлик баҳсларида италияликлар Сара Эррани ва Жасмин Паолини, эркаклар ўртасида эса Марсель Граноллерс ва Орасио Себальос жаҳон чемпиони деб топилди. Ўсмирлар ўртасида болгариялик Иван Иванов ҳамда америкалик Кристина Пеничкова биринчи ўринни эгаллади.

"Эркаклар ва аёллар ўртасидаги яккалик ва жуфтлик баҳсларида жаҳон чемпионлари мавсумнинг барча натижаларини ҳисобга олган ҳолда объектив мезонлар асосида танланади. "Катта Дубулға" турнирлари ва жамоавий ITF жаҳон чемпионатлари - Дэвис Кубоги ва Билли Жин Кинг кубогига алоҳида эътибор қаратилмоқда", - дейилади ташкилот пресс-релизидаги хабарда.