IV ёзги Осиё ўйинларига селекция ишлари олиб борилмоқда

Давлатимиз раҳбари 2020 йил 29 декабрда Ўзбекистон Республикаси Олий Мажлисига қилган Мурожаатномасида ушбу спорт анжуманини юқори савияда ўтказиш борасида ҳам алоҳида тўхталиб ўтгандилар.

Мазкур топшириқлар ижросини ўз вақтида ва самарали таъминлаш мақсадида барча ҳудудларга амалий ишлар бошлаб юборилди. Жумладан, Жиззах вилоятида ҳам иқтидорли ёшларни саралаб олиш (селекция) ишларини олиб бориш мақсадида мусобақалар ташкил этиш режалаштирилган.

Бундай ишларни амалдаги кўриниши сифатида Жиззах вилояти Ғаллаорол туманини кўрсатиш мумкин. Куни кеча туман Жисмоний тарбия ва спорт бўлими, «Ёшлик» жисмоний тарбия ҳудудий бўлими, Болалар-ўсмирлар спорт мактаби ҳамда Халқ таълими бўлими билан ҳамкорликда 2025 йилги ёшлар ўртасида IV ёзги Осиё ўйинларига тайёргарлик ишларини олиб боришга бағишланган йиғилиш бўлиб ўтди.

Унда 2008-2009 йилларда туғилган спортчи-ўқувчилар ўртасида спортнинг волейбол, баскетбол, қўл тўпи, футбол, стол тенниси, бадминтон, кураш, дзюдо, эркин кураш, бокс, бадиий гимнастика, спорт гимнастикаси, таэквондо ва енгил атлетика турлари бўйича туман биринчилиги мусобақасини ўтказиш масалалари кўриб чиқилди ва жорий йилнинг март ойида тасдиқланган Низом асосида мусобақаларни ўтказишга келишилди. Ҳозирда мусобақалар ўтказилмоқда.