Жаҳон чемпионати. Раҳмонов ва Қўлдошев бронза учун курашади

65 кг вазнда юртимиз шарафини ҳимоя қилаётган Аббос Раҳмонов нимчорак финал беллашувида Ибрагим Абдураҳмановга қарши баҳс олиб борган ва муросасиз кечган баҳсда 7-7 ҳисоби қайд этилиб, россиялик курашчи чорак финалга йўл олганди. Абдураҳмонов финалга йўл олгани боис Аббосда бронза медали учун имконият сақланиб қолди. Бунинг учун у аввалига ўтиш беллашувида италиялик Колин Рилбутони, кейин эса озарбайжонлик Зираддин Байрамовни мағлуб этиши шарт.       

Шунингдек, 70 кг вазндаги курашчимиз Бегижон Қўлдошевда ҳам бронза учун имконият сақланиб қолди. Қўлдошевни 1/8 финалда мағлуб этган арманистонлик Вазген Теванян финалга йўл олди. Бугун Бегижон ўтиш баҳсида германиялик Шамил Устаевга қарши гиламга чиқади. Ғалаба қозонган тақдирда уни туркиялик Чунейт Будак қарши олади.