Жаҳон кубоги. Финал чиптаси учун кечаётган ўзбек дербисининг иккинчи партияси ўтказилди

Ушбу босқичга икки гроссмейстеримиз Нодирбек Якуббоев ва Жавоҳир Синдаров етиб келган ва қизиғи, улар 1/2 финалда бир-бирларига қарши дона суришяпти. Бироз аввал ярим финалнинг иккинчи партияси якунланди. Ҳар икки шахматчимиз ҳам бехато ўйнаган учрашувда яна дуранг натижа қайд этилди. Бугун Синдаров оқ доналарда ҳаракат қилди. Энди эртага ҳал қилувчи тай-брек партияларига мурожаат қилинади.  

Эслатиб ўтамиз, 1/2 финалда ғалаба қозонган шахматчилар Жаҳон тожи учун кечадиган Даъвогарлар турнири чиптасини қўлга киритади. Ярим финалда ютқазганлар эса ўзаро 3-ўрин учун баҳсда сўнгги йўлланма тақдирини ҳал қиладилар. Ҳар қандай ҳолатда ҳам Даъвогарлар турнирига аниқ бир шахматчимиз йўлланмани қўлга киритади. Иккинчисида ҳам охиригача имконият сақланиб қолади.