Жаҳон кубоги. Финал чиптаси учун кечаётган ўзбек дербисининг илк партияси якунланди

Хабарингиз бор, ушбу босқичга икки гроссмейстеримиз Нодирбек Якуббоев ва Жавоҳир Синдаров етиб келганди. Улар 1/2 финалда бир-бирларига қарши тушиб қолишган эди. Бироз аввал ярим финалнинг илк партияси якунланди. Ҳар икки шахматчимиз ҳам бехато ўйнаган учрашувда дуранг натижа қайд этилди. Бугун Якуббоев оқ доналарда ҳаракат қилди. Эртага ярим финалнинг иккинчи партияси ўтказилади ва энди Синдаров оқ доналарда ўйнайди. Дуранг бўлиб қолган тақдирда эртадан кейин ҳал қилувчи тай-брек партияларига мурожаат қилинади.  

Эслатиб ўтамиз, 1/2 финалда ғалаба қозонган шахматчилар Жаҳон тожи учун кечадиган Даъвогарлар турнири чиптасини қўлга киритади. Ярим финалда ютқазганлар эса ўзаро 3-ўрин учун баҳсда сўнгги йўлланма тақдирини ҳал қиладилар. Ҳар қандай ҳолатда ҳам Даъвогарлар турнирига аниқ бир шахматчимиз йўлланмани қўлга киритади. Иккинчисида ҳам охиригача имконият сақланиб қолади. 

Айни дақиқаларда иккинчи 1/2 финал жуфтлигида россиялик Андрей Есипенко хитойлик Вэй Йига қарши дона суряпти. Ҳозирча доскада тенглик ҳолати бўлиб турибди.