Жалгасбай ва Абдулло жаҳон чемпионати бронза медали учун курашни давом эттиради

Кеча юнон-рум кураши бўйича Ўзбекистон терма жамоаси вакиллари Абдулло Алиев (72 кг) ва Жалгасбай Бердимуратов (82 кг) 1/4 финалда рақибларига имкониятни бой бериб қўйишди. Алиев саралаш босқичида қирғизистонлик Ирискелди Хамзаевни 2:1, нимчорак финалда молдовалик Михай Петични 7:2 ҳисобида мағлубиятга учратди. Чорак финалда эса Франция вакили Ибраҳим Маҳмуд Ганемга 0:6 ҳисобида ютқазди. 

Жалгасбай Бердимуратов эса саралашда арманистонлик Карен Хачатрянни 6:0, нимчорак финалда қозоғистонлик Евгений Поливадовни 9:0 ҳисобида доғда қолдирди. Венгрия вакили Эрик Сзилвассига қарши чорак финал баҳсида эса ютқазди (1:6). 

Курашчиларимизнинг бахтига уларни мағлуб этган полвонлар финалга етиб боришди. Натижада бугун Бердимуратов ва Алиевда бронза медали учун курашиш имконияти юзага келди. Бунинг учун улар биринчи галда ўтиш беллашувида ғалаба қозонишлари талаб этилади. Абдулло Алиев арманистонлик Хайк Меликянга, тажрибали Жалгасбай Бердимуратов эса озарбайжонлик Гуран Гурбановга қарши гиламга чиқади.